香港有冇愛國歌?(五)彰顯民族信仰

再有一類愛國歌曲,係緊緊扣連民族信仰。英國國歌《天佑女王》,就直接訴諸於基督教信仰,祈求上帝保佑女王。美國雖然號稱政教分離,但係《共和國戰歌》亦以軍人為上帝奮戰為主題,描述軍營各處都有基督嘅身影,最後一段甚至講到軍人為彰顯上帝正義,戰死沙場亦在所不惜。

 

深圳河以北嘅紅歌,則將「愛中國」扣連「愛黨」同「愛社會主義」,實際上亦係表明佢地嘅信仰源頭。當然,大家都可以話佢地早就放棄自己嘅信仰,但係「反共不反華」嘅核心觀念,就係可以將現代中國嘅身份,同紅歌傳統完全脫鉤。但以咩野取代紅歌,果班大中華膠從來都冇好好講清楚。港中矛盾嘅原始分岐,亦由「香港人應否信奉紅歌」開始。

依一篇文章,其實唔容易寫。尤其經歷過梁氏五年之後,仲有冇直接關於觀念嘅歌,係團結到香港人?吸納紅歌,或者吸引到部份藍絲,但係成個黃營都唔會認同。《光煇歲月》嘅「風雨中抱緊自由」,則會被人認為係搞事。就算黃營之中,「今天我」同「天有光」都唔會同場演出。

或者,實際上自傘後嘅兩年,香港人實際上仍然尋找緊可以團結港人嘅共同政治觀念。自從特首選舉之後,政治吹風話要大和解,但係一日未搵到共同觀念嘅「最大公約數」,任何和解都只會係暫時同盟,稍有變動,社會紛爭又會再起。

或者,最大公約數就係《年少無知》裏面嘅「如果,活著能坦白,舊日所相信價值不必接受時代的糟蹋。」每個人都可以有堅持自己嘅價值,或者就能夠達到《天與地》裏面嘅「和諧唔係一百個人講同一說話,和諧係一百個人有一百句唔同說話之餘,而又互相尊重。」

就算係美國,雖然大部份民眾都會尊重《共和國戰歌》,但係依首歌比較受共和黨擁護,亦係事實。成個信仰體系之中,咩野係應該容許多元,咩野係需要維持統一觀念,或者就係每一個成熟社會所要思考嘅問題。

尤其當己方處於弱勢,更要思考點樣一方面團結更多人,一方面又避免左膠式嘅全面投降。宣傳觀念嘅信仰歌曲,反而係促進溝通嘅工具。