香港有冇愛國歌？（四）歷代捍衛香港

香港發展至今，當然唔係一帆風順。以前演藝界以香港巿場為主嘅年代，每次香港出現危機，都會有新歌激勵士氣。面對危機而寫嘅愛國歌，往往最能傳世。美國國歌，原本係一首詩。1812年英美戰爭，華盛頓特區俾英軍攻佔之後，旁邊嘅麥亨利要塞仍然奮勇戰鬥，由詩人寫低當時情景。後來加入配樂，再由人民逐漸採用，幾十年之後先正式立為國歌。

筆者有印象嘅第一首歌，係1983年嘅《洋紫荊》，因應兩個大國嘅權謀，香港人嘅願景好簡單：「讓洋紫荊永遠盛放，永遠是原狀：香港！」歌裏面歌頌香港係「霓虹橙光，購物天堂；自由都市，百業繁旺。」而且「外地人都嚮往要看看，這獨特社會香港。」

今時今日，新一輩香港人嘅願景其實都冇變過，就係要保存獨特嘅香港，所以歌裏面講嘅：「為未來香港再努力幹，不斷地發展使它更光。互相幫，困境風波一起去擋，」今日仍然可以感動港人。

八九年對香港人打擊唔細，故此令移民潮愈演愈烈。係果個背景之下，出現過幾首鼓勵香港嘅歌。一首係群星嘅《凝聚每分光》，訴求異常簡單：「This Is Our Home. This Is Our Place. This Is Our Dream. We Love Hong Kong.」今日嘅本土派，其實大部份都係同一個訴求：「熱愛香港，人人同心，共創香港新的希望，香港人高峰天天創，凝聚了每點光茫，前途漸明朗，世界盡瞧著這方。」

不過《凝聚每分光》比較離地，只係用華麗嘅字句，劃出光明願景。例如：「凝聚了每點光茫，前途漸明朗，美滿前途伴你闖。」當日未必能夠令移民一族冷靜，今日亦未必能令現代港人重拾信心。

同期嘅《同舟共濟》，就顯得更貼地。依首歌以「我與你同坐這條船，無情浪把它猛捲，滿天風雨，視野未能見，亂作一大團，不知怎算。」開始，講明歌者明白香港係經歷緊危機，前路並不容易。但係「香港是我心，一顆不變心，實在極不願，移民外國做二等公民」，所以先要「奮勇地面對，令到這條船，永不翻轉。」幾代人嘅願景，其實都只係要家園永不翻轉。

http://www.youtube.com/watch?v=5lZmiVEu9Do

到左2001年，香港經歷黃金時期之後第一次長期經濟危機，就出現左《同步過冬》，希望港人能夠「同步過冬，一起對付寒風。」之後紀念沙士英烈謝婉雯醫生嘅《我信愛是恒久》（註：該曲以基督教版本嘅《愛是不保留》較為出名），再後來嘅《囍帖街》，以及近兩三年嘅作品，其實一直都有鼓勵士氣嘅歌。歷代港人，從來都冇忘記過：「香港是我家，怎捨得失去它。」