清末政治運動,一直有革命派同立憲派兩條路線。係情況未至絕望之前,普通人都係同情立憲派,因為唔會突然打擊民眾生活。所以孫中山頭九次革命,一般人都只係覺得佢地係度搞事,影響大清國嘅經濟發展。

而革命派最後成功,同清廷自己嘅失誤關係最大。1907年,清廷應承全國立憲,準備係十年後實行。第二年慈禧太后去世,宣統帝繼位,並且由父親攝政。

1909年(宣統元年),清國舉行第一次省諮議局選舉,並且再間接選出資政院。第二年(宣統二年),資政院開院,各地清豬見到選舉成功完成,以為後生嘅攝政王會贊成憲政,就再施加壓力,要求儘快普選議會,設立責任內閣,將朝政交俾向國會問責嘅內閣,變成接近英式嘅議會內閣制。

攝政王一驚之下,就將立憲期縮短至五年到宣統五年,並且承諾先改革官制為內閣制。但係半年之後,當清廷廢除軍機處,成立內閣制度之後,任命嘅新內閣13名閣員,九人係滿蒙貴族,其中七人係皇族。內閣名單一出,即刻被譏為「皇族內閣」。

當時名聲最響嘅張謇,就話:「辛亥年四月,政府以海陸軍政權及各部主要均任親貴,非祖制也。復不更事,舉措乖張,全國為之解體。」自康熙朝嘅慣例,清廷一向都係官員滿漢大員,各佔一半。皇族內閣號稱改革,但實際上削去漢族士大夫階層嘅勢力,基本上清廷得罪左漢人社會之中,最重要嘅盟友。

而已經遠離官場,成為報紙KOL嘅梁啟超就鬧:「將來世界字典上,決無複以『宣統五年』連成一名詞者。」由預備立憲開始,清廷一直拖延,先會出現宣統八年、宣統五年嘅承諾。立憲派一直配合,就係因為相信清廷最後都要履行承諾,改制成為君主立憲國家。因此,到最後竟然出現「皇族內閣」,結果令立憲派徹底失望。到槍聲再響,民眾唔再支持政府,就成為辛亥革命。

當政權未有任何承諾,如同今日嘅北韓,勢難聚眾。但係政權先承諾還政於民,然後一再搬龍門,遣反自己嘅承諾,先至係最大嘅危機。古有清末變局,今有各地顏色革命,都係改良派驚覺被騙,先至累積壓力,到導火線一出,就一發不可收拾。以古鑑今,香港未來五年,局勢難有平和。