嗱,教育局班友就戆居居嘅,如果啲大文學家生不逢時,生着係香港,又要去考公開試,唔好話做作家,書都無得佢地讀添呀。今日先講下宋代豪放派嘅蘇軾,乜乜乜「明月幾時有,把酒問青天」(水調歌頭),「大江東去,浪淘盡」(念奴嬌),中學都一定讀過,不過佢最勁嘅,其實係呢篇文……

佢細細個考試嗰陣,作咗篇《刑賞忠厚之至論》,入面有個咁嘅例子︰話說以前有個大法官叫皋陶,佢判咗個罪犯死刑,之後堯帝話大和解特赦個罪犯。咁皋陶又唔gur喎,咪剩剩雞捉佢返嚟判多次死刑囉,但又咁唔好彩畀堯帝知道,佢又行使特權赦免佢。如是者,皋陶定左三次罪,堯帝赦足三次罪。蘇軾就用呢個例子,論證刑賞重寬,寧縱勿枉。

嗰時班主任見到都突咗一突,心諗點解個例子我哋飽讀詩書都未聽過。當時又未有google神,佢哋就三口六面搵蘇軾問清楚啦︰「喂細路,句嘢有無reference先,footnote識唔識落呀你?」點知蘇軾聽完之後,就大笑左幾聲,然後講句「想當然耳」。譯返做廣東話即係︰「無呀,我作架咋。皋陶係釘官,堯帝又係仁君,一個殺人一個放人,好正常啫,估都估到係咁啦,一定係咁,除非唔係。」

嘩大佬,咁即係吹水啦,考試唔背例子入場仲要老作?考評局班友實肥硬你,下年請早啦廢青。但歐陽修班友就開通啦,話呢條友雖然係老吹,但又吹得合情合理,有膽識有諗頭,咪頒左個科舉第二畀佢囉。(本應係第一嘅,因為嗰時係塗名考試,用而家講法,即係份卷只得考生編號,見唔到學生名。主考歐陽修驚份卷係佢大弟子曾鞏嘅,容乜易到時被人話黑哨,咪特登將最好嗰份排去第二名。點估到,原來份嘢係蘇軾寫嘅。換着係用人唯親嘅香港,就無呢支歌仔唱啦。)

咁考評局班友,認為事實勝於雄辯,存在就是合理,吳克儉仲未落台,一日係局長,一日都係好人呀。