※內文含有劇透,敬請讀者留意。

一念無明真係一套唔錯嘅港產片,講嘅唔只係香港嘅問題,仲有香港人嘅問題心態,人地結婚就指三道四話人啲酒貴唔貴,個場豪唔豪,一啲都唔尊重結婚對新人,當然係香港要結婚嘅新人係咪想做一場 show 又另一個故事喇。

另一個好普遍嘅現象就係拍片放上網。啲人係超市見到「阿東」(余文樂)係咁食朱古力就拍佢片放上網,之後有人起底搵佢之前發生過咩事,然後仲要有主流傳媒大肆宣傳一番。

大佬呀,人地發生咗咩事啲人又事幾多,所謂起底又真係知道有幾深?主流媒體照傳網上起底嘅消息話余民樂弒母,但係其實法庭係判咗係意外。唔知頭唔知路嘅人就放上網俾人批鬥,啲人真係當自己公民記者咩,咪同影人唔讓批鬥坐班友咪一樣鐘意講人是非囉。

到我最想講嘅方皓玟,佢係一念無明算表現真係不俗,其實我覺得佢唱歌都唔差,連男神黃子華都覺得佢係個被under rating嘅歌手,順帶一提無方皓玟係一念無明係無收片酬。講番係一念無明個角色,佢係做余文樂未婚妻 Jenny,不過係余文樂入精神病院後都無咩聯絡。後嚟佢地約咗出嚟食飯,Jenny 表示佢仲供緊「佢地」層樓,不過得佢一個供就供得好辛苦,而且仲要幫余文樂還債,不過就唔想賣層樓,驚變銀主盤,佢咁都撐到落去就係因為佢最近得到好多「力量」。一聽到「力量」,我就緊係諗起宗教或者嗰啲心靈勵志課程喇。

之後無耐,余文樂就同方皓玟上咗教會,之前嗰句「得到好多力量」就係編劇嘅伏筆。上到教會之後,方皓玟就企上講台,係一班信眾面前作出一段聲淚俱下嘅「分享」,內容大致係:

「相信大家都知道邊個係阿東,我係一個普通女仔,想30歲前建立家庭,生小朋友,後嚟同阿東準備結婚,係何文田半山買咗個單位。不過之後係新聞知道阿東屋企出咗事,阿東入咗醫院再無供數,阿東亦借落孖展攪到有人要追數。」

咁講法,教會中人都知阿東係邊個,睇怕方皓玟係教會都「分享」咗阿東好多次,至於教會中人有無對阿東再作「討論」就無係戲裏提及,但係阿東在場聽到自己曾經俾人咁樣當眾分享其實都好難受。

而方皓文要建立嘅係一個家庭,不過係香港有好多人就係覺得買層樓就同建立家庭係一個等同關係,係要有層樓先有家庭,依個真係成功洗腦教育。其實余文樂唔供樓、仲有一身債要要孭,文皓玟做咩仲要咁辛苦頂住層樓呢?放咗層樓就已經可以解決好多問題,一層樓對香港人嚟講真係重要過佢條命。

講番余文樂,係依個當眾分享環節佢堅係一個受害者,方皓玟係一班人面前講出余文樂對佢傷害有幾大,後來仲要好怨恨咁睇住余文樂講出一句:「其實我好憎你」,唔好話係個情緒病人,一個所謂正常人都好難頂喇,有啲教會就係鐘意做埋依啲野。之後方皓玟就講一句「藉著主嘅大愛,我係可以寬恕你。」余文樂終於頂唔順走咗,就係走咗去超市係咁食朱古力舒緩情緒,當然余文樂咁大反應嘅另外一個原因係期望可以同方皓玟修補關係,不過俾方皓玟咁當眾話恨佢,原諒佢係因為主嘅大愛,依樣野真你令余文樂無地自害,徹底絕望。

假如余文樂無走到,仲留係教會會點?會俾人勸介一番?俾人教化?定會俾人批鬥?戲裏面嘅余文樂頂唔順走咗可能係好事,如果唔走可能可以好恐怖。講一個親身經歷俾大家聽下,本人一位前度入咗教會,而本人就係佢係啲教會朋友之中俾「分享」嘅目標,依班教友就同佢講一個男朋友應該係點點點,咁我就同佢講:「阿 A 話我要點我就要點,阿 B 話要點我又要點咁我真係唔掂架。」咁但係情況繼續係咁,佢就係要我被佢班教友教化,而依個教化嘅恐怖之處唔只係我要同佢地同化,仲係要我變成佢班教友幻想中嘅男朋友,結果就係分手收場。如果我好似余文樂咁係一個情緒病人,我上到依啲教會俾人批鬥話我應該點點點就真係大鑊(利申:我死都唔上個教會)。不過係度想講方皓文係依段戲真係做得好,咁當然劇本亦都係好野,而金燕玲同余文樂都有出色演出。

致於依套戲係有政府資助,咁內容會唔會因為咁而有所限制我就唔敢講,不過成套戲就算講到劏房問題都唔覺有提到政府對房屋政策嘅問題,其實成套戲都係200萬,開戲可能真係可以諗下眾籌,拍番啲無咩限制嘅真正港產片,咁當然題材會唔會太敏感而無戲院敢上又要諗諗喇。