畢業作為每個大學生嘅人生大事,當然會隆重其事,租一件畢業袍去影相自然係每個學生都會做嘅事。但對於今年喺恒管畢業嘅大學生嚟講,租件袍都出好多事。

事源過去恒管一直都指定TYG做畢業袍供應商,但過去幾年嚟喺學生之間都指出品質一般,於是今年就有新供應商睇準商機,加入戰團為學生提供新選擇。據了解,有多達三百幾名學生向新供應商小王子訂購畢業袍,而小王子亦依照過去TYG版畢業袍做樣式,造出一模一樣嘅畢業袍。

去到三月二十一日,校方忽然指定Simpro為畢業袍供應商,Simpro所設計嘅畢業袍與其餘兩間供應商都有所不同,當時已經有好多學生向小王子訂購畢業袍。同月二十九日,恒管教務處更指若穿上與Simpro設計不同嘅畢業袍,將不准參加畢業禮同畢業攝影日!

有學生認為校方行為實為大石砸死蟹,引起好多應屆畢業生不滿,紛紛到教務處查詢畢業袍係咪要百分百符合Simpro設計,結果校方依然企硬,由於校方宣布新規定係喺三月二十九日先公布,而Simpro卻喺四月三日截止訂購,變相要一眾畢業生立即決定,乖乖付五百大元。對比起小王子出售嘅畢業袍只需四百元,索價五百五十的Simpro畢業袍自然引起學生質疑。在facebook page「恒管Secret」就有學生質疑價錢唔合理,比起去年TYG都要貴上一百五十元;亦有學生質疑學校利用行政手段去要求所有學生向Simpro訂畢業袍,認為學校與該供應商有不可告人嘅秘密,又指小王子早在十二月初就造好樣板供學生參考,要到月尾才突然殺出一間「指定供應商」,做法不合理亦不尋常。

經本報記者追查後,新設計是由供應商Simpro和校方單方面商討和設計,事前並沒有學生和其他供應商知情。今次事件引起大批恒管畢業生不便之餘,更引發學生質疑校方學畢業袍供應商有不尋常舉動,實在係令人難以理解。