十年前,加拿大滑雪選手Chandra Crawford係冬季奧運會贏得金牌,頒奬儀式佢高聲帶唱國歌,係第一代嘅viral video。當日新聞主播嘅評語係:「如果你夢想參加奧運,如果你真係入選,真係上到頒奬台,你應該咁樣唱我哋嘅國歌。」

當時筆者仲懷有大中華心,都係七分羡慕,三分妒忌,點解其他國家可以咁自然去熱愛自己嘅國歌,而我哋莫講係《義勇軍前進曲》,就算「山川壯麗,物產豐隆」,都有一種莫名嘅陌生感。到經歷完過去三年嘅發展,入過旺角場大叫「We Are Hong Kong」之後,終於明白其實我並非不愛國,只係過去制度所強制嘅效忠對象,從來冇吸引過自己。之後豁然開朗,就算運動處於低潮,亦深知自己愛嘅係邊一個民族。

有軟實力嘅國家,唱國歌環節係可以好感動。2014年,加拿大一場冰上曲棍球賽,時值亡兵紀念日,故此賽前就有迷你閱兵儀式。一分鐘默哀之後,應由管風琴領唱國歌。但係民眾熱烈回應,管風琴手甚至係半首之後停止演奏,俾民眾清唱,感覺更為震撼。全國冰上曲棍球聯盟(NFL),亦將影片上載,廣為流傳。實際上,依類小事件先最能夠證明一個國家嘅國民教育係未成功。

而且鄰國之間,就算國力強弱懸殊,亦唔一定要長期對峙,久唔久就爆出互相對罵,甚至杯葛對方嘅政治事件。2014年,美國電視台報導,某場職業聯賽由加拿大嘅多倫多楓葉隊主場,場內坐滿嘅係加拿大球迷。賽前安排,係由歌星獻唱兩國國歌,但係當美國國歌唱到一半,出現IT問題,咪高峰突然失聲。現場加拿大球迷嘅反應,竟然係代替歌手,清唱剩番嘅幾句。兩國情誼之深,可見一斑。

亞洲某類國家,單論總經濟量,或者真係躋身大國之列。但係先唔好討論,係某類場合,該國國歌係會俾全場噓番轉頭。單睇上面嘅多倫多球賽,該亞洲強國附近嘅一眾小國,又有邊個國家嘅民眾,會係該國出醜之際,主動出手補鑊?依一代嘅領導人,經常講國家軟實力。能否服眾,令諸小國主動尊重,就係軟實力嘅最佳指標。