「我哋再次被捲入鬥爭,同盟友一齊接受某主張嘅挑戰。假如依個主張勝利嘅話,將會終結世界上嘅文明制度。」

「依個主張容許一個國家,係追求一己權力嘅過程當中,漠視自己簽下嘅盟約同莊嚴承諾,亦不惜針對其他國家嘅主權同獨立,行使或者威脅行使武力。」

「依個主張,剝除所有偽裝後,就只係一個原始主張:強權等如真理。而假如依個主張得以確立,我國同成個英聯邦嘅自由都將受威脅。」

以上係英皇佐治六世(當今英女皇嘅父皇)係1939年,英德終需再戰沙場時候嘅演講。因為佐治六世患有語言障礙,公開演講對佢來講係極難之事。當年佢點樣克服語言障礙,就被拍成奧斯卡最佳影片《皇上無話兒》(The King’s Speech)。以上演講,係電影最後一段亦由男主角原稿讀出。

當年嘅敵人係納粹主義同更廣義嘅法西斯主義,理論上已經隨住德意日二戰戰敗,早已煙消雲散。但係法西斯主義,係未真係完全絕跡於世上?法西斯主義只係極端愛國主義,號稱本國復興,鼓吹民族主義,自視區域霸主,訓練民眾目空一切;面對鄰國,漠視盟約、違反承諾、事事威脅鄰近諸小國;到反口次數太多,誠信破產之後,剩低嘅就只能以強權壓迫。環觀世界諸大國,完全符合依幾個條件嘅,數目唔會太多。

德國當日擴張之路,亦由吞併同係日耳曼民族嘅捷克德語區開始,以民族統一之名進行。英國當日同希特拉簽定慕尼黑協議,亦以為德國會係吞併該區,完成民族統一之後,融入國際社會。當然希特拉嘅胃口,遠遠超過英國預期:捷克德語區之後,就係捷克捷語區、奧地利等,直到最後德國已經完全軍事化,劍指波蘭,英法兩國先向德國宣戰,結果代價沉重。

同強權簽定協議,事後任由對方反口,似乎係英國外交部最擅長嘅策略。1936年慕尼黑如此,1984年亦如此。執筆之時,特首選情形勢愈來愈明朗,似乎真係會出現民望最高者敗選嘅情況。假若結果如此,就係正式撕破面具。港豬最根深蒂固嘅問題係佢地相信「性善論」,認為對方係會信守承諾。但係每個人身邊,都總會識得幾個屢次違約、信口雌黃嘅人,間中總會有幾個經濟成就唔低。政體只係人類嘅集體,既然有毫無誠信之人,點解會無毫無誠信嘅政體?

註:
佐治六世嘅演講原音:https://www.youtube.com/watch?v=opkMyKGx7TQ
《國王無話兒》嘅演譯:https://www.youtube.com/watch?v=AHY2UzOonig
該演講英文原文:https://www.awesomestories.com/asset/view/George-VI-King-s-Speech-September-3-1939