當你病到瞓極都唔夠精神、咳到肺都甩埋出嚟、喉嚨痛到吞口水好似比針吉嘅時候,你除咗想唔洗返工,你最想就係有人關心你。而當中最完美嘅莫過於瞓到咁上下女朋友喺床頭輕輕咁叫醒你,放低一碗自己煲嘅白粥,然後將啲粥一羹一羹吹到啱食嘅溫度再放埋你咀邊喂你食。人生得一如此女友的話我真係病多幾次都肯。

兩個人喺埋一齊最重要唔係你為對方買咗幾多嘢,講咗幾多甜言蜜語,而係你願意為對方付出幾多心意。一碗白粥出街買十蚊可能有找,但一個平時煮飯都懶嘅女仔願意為你洗米煲粥睇火,用成個鐘去煲碗白粥你食,淨係依份心意已經足夠食咩都覺口寡寡嘅你視依碗白粥係你食過最好味嘅食物。你知佢平時係麻煩啲,揀食咩都要諗十幾分鐘;睇韓劇係誇張咗啲,一追就追五六七套;約你又唔多準時,遲廿分鐘係基本。不過每次你唔舒服嗰陣,佢唔係飛奔去陪你睇醫生就係為你準備清得嚟又唔難食嘅三餐,知你會擔心佢安全,同你一齊之後就唔會同朋友出夜街,更加自動絕跡煙酒之地。可能佢平時對住你做嘅嘢唔會特別纏綿,唔會成日話愛你鐘意你,但你好清楚佢一早記住你嘅喜好,唔會去做啲令你唔開心嘅舉動。一對戀人要喺人地面前放閃光彈好易,但平時相處會照顧到對方感受,同時比到對方安全同可信任嘅感覺,依種先係男人最想要嘅幸福。

食緊女朋友親手煮嘅白粥,望住佢擔心你嘅表情,你用手輕輕掃一掃佢頭髮,同佢講你好快好返,然後用紙巾抹一抹嘴,錫咗佢額頭一啖,因為怕傳染比佢。依種平淡嘅幸福感,真係諗下都覺得嚮往。

得啦,叫我唔好FF嘛,知啦。

圖片來源:網絡取材