關公大顯神威 之 第579章

自從雨革請左關公鎮守旺⻆之後,關公兩年來保佑香港,彷彿已經成為香港民主運動嘅主保神祇。短短幾個禮拜,深藍公關災難不斷,黃營唔駛出動,對方都自動失分。部份失誤,例如We Connect,起因純粹係公關團隊嘅懶,實際上只要事先Google 一下,其實完全可以避免。其他諸如東施效顰,人地兩公婆賣溫情,自己又急急寫一封用新細明體簽名嘅所謂情信,但係內容又比林覺民《與妻訣別書》更大義澟然,寫成因為深愛,先推老婆出去受靶,就係因為團隊離地太久,寫出來嘅野接唔到地。比著係外國,競選中嘅候選人早就炒左個公關主任,換人再戰。
但係有時失誤,卻係人算不如天算。今日筆者就係whatsapp收到以下一句:

「因為579班,所以579票。就算選到,都係579能力聲望去管好香港。終於579五年,就被人轟番落台。」

579票,多一票唔多,少一票唔少,暗合香港人對佢嘅諗法。你話中間無神明介入?我就唔係好信喇!