當更警大戰休班警

「各位香港市民,歡迎又返到嚟差佬大戰嘅現場呀,我係節目主持人雙花紅棍曾sir」

「啊曾sir你就勁啦,之前做領隊一句『你地無做錯』,激發士氣,當更警個個狀態大勇,屢創佳績。而家你unun腳,退而不休,又收幾百萬一年喎」

「過獎過獎,我地都係講返場大戰先。其實節目名就唔係好正確嘅,參加比賽嘅有三支隊伍,當更警、休班警、仲有輔警,不過前兩者表現出色,兩邊咬到叮當馬頭,只怪輔警唔係全職罪犯,咁就難鬥啲嘅」

「講下往績先,遠嘅唔講,就只係講上年表現呀。公開數字嚟睇,休班警全年總共攞左30分,而當更警得11分,被大幅拋離喎」

「啊叔幾時都話,睇事情唔可以咁表面嘅。你就唔知啦,警隊為左隱藏實力,其實有好多單都無公開呀。好似現任領隊盧sir咁呀,上到立法會咪話全年得嗰廿單。點知一個唔好彩,被記者搵到料,咁咪唯有認左佢囉。而家就話一年四十單啫。講真,我做過領隊,四十單,你咪點啊叔啦?」

「不過休班警唔單止數字上領先喎,呢班隊員都多才多藝,犯案手法層出不窮,實情全民皆兵咁濟。偷嘢、藏毒、非禮、影裙底、食霸王雞、醉酒駕駛呢啲雕蟲小技就唔講啦,出色啲嘅有射馬騮啦、性侵犯個女啦,性侵犯個女嘅朋友啦。你話當更警點鬥先?」

「喂當更警都唔輸蝕架。畀假證供、砌生豬肉呢啲你休班警做唔做到先?梗係做唔到啦!你唔當更點砌人生豬肉呀?哈哈。我只係講一單,唔晒咁多口水,當值警長爆差館格,偷保釋金過大海,呢單都估佢唔到啦。所以話,學隻米老鼠話齋,大家犯事犯得咁開心,咁畀心機,就打個和囉。話晒當班警休班警咪又係警隊,分咁多傷感情呀。陣間同事有壓力啦喎,又要發洩下,搵市民出氣,一個唔該攞多幾分,咁你唔好怨呀」

「都係曾sir有道理。不過比賽都係要繼續嘅。兩派人馬新年之後都一於少理,繼續馬不蹄咁犯事。當更警就威啦,剩係一月咋,就攞左一百一十分啦」

「嘩,一個月就破百,因乜解究咁犀利?」

「本身都係碎料黎嘅,賣下假手錶,入下女更衣室,形事毀壞咁啫。但可能見到上年輸得太多,咪集體喺警署上鹹網,一攞就攞左一百分啦。今次仲唔係遙遙領先?」

「o靚仔,當更警二月後勁凌厲呀!二月七俠宣判,當更手足以至全港市民都對佢地寄予厚望,相信佢地可以成功得分嘅!咁個世界公平嘅,一分耕耘一分收穫,打左人咪坐監囉,好合理呀,上星期當更警靠七俠咪攞左七分囉,哎呀,唔好意思,係八分先啱,啊陳sir喺差館再打犯,梅開二度呀」

「車,咪又係得嗰七分咁大把。你估休班警流架咩?呢邊個工會主席陳sir,見勢色唔對,吹一吹雞隻,就叫到三萬幾人出嚟非法集會。真係氣勢如虹,望塵莫及呀。三萬分你點追先?」
「等等先等等先,吹水有個譜,警隊先係得嗰三萬人多啲。唔通嗰晚全部人去晒集會,無人當更咩?」
「曾sir,你當左咁多年差,仲喺道講邏輯?乜手足講道理架咩?而家差人集會使唔使你教先?」

「但呢個唔係集會嚟個喎,啊陳sir話係特別會員大會,點睇都係得分無效啦下嘛?」

「咁你做賊會唔會話自己係賊先?警隊夠話保護市民政治中立啦,咪又係得個講字!總之呢三萬分就食硬你啦」

「好啦好啦,咁休班警連封印左四十年嘅大絕都使出嚟,又無理由唔判佢地贏嘅。呢招喺當年話晒都收左廉政公署皮,真係要寫個服字畀佢地!」

「嘩,只係兩個月,賽事已經白熱化,幾咁精彩!我地就放長雙眼,睇下之後當更警點樣絕地反擊,連橫犯事收復失地喇。但其實大家一家人,都係全港最大犯罪集團,得分超越到傳統黑幫組織已經令人振奮架喇。唔使太出力嘅」

「又唔係喎,警黑一家親。警隊同飛仔,(普通話)大家都是黑社會,不用分那麼細!」

「哈哈,曾sir做咩今日咁真心?好,時間到呢度,下次再見」

圖︰聚言時報、傑出休班警系列