曾胡入閘之後 藍營分裂已成事實

執筆之時,曾俊華同胡國興都宣佈已經攞到足夠提名,如無意外,應該可以入閘選舉。提名期結束之前,最大的懸念有兩個。一個係淺黃陣營,會唔會有政治覺悟,將剩番嘅提名票,交俾葉劉;一個係林鄭最終可以攞到幾多個提名。

提名葉劉,政治目標好簡單,主要係避免新民黨同葉劉嘅其他票源,落入對方手上。如果葉劉可以界走林鄭票源,更係界得一票得一票,係總共一千二百票嘅選舉之中,每一票都可以改變結果。現時嘅選票算術,最大目標係阻止任何一個候選人第一輪投票攞到600票以上,希望第二輪投票時候變成一對一對決,就有望選出比較溫和嘅特首。所以放葉劉入閘,只會對淺黃有利。

至於林鄭,本來攞住三四百票入閘,已經係強勢入閘。但係經歷兩個月嘅政治活動,某方勢力力挺林鄭,甚至惡意打壓其他特定嘅候選人,實際上已經變成賭身家。五年前深淺藍分裂,尚係第一次,而且各方陣營個人關係千絲萬縷,並非不可和解。假如現屆政府,並非強分敵我,持續製造對立,藍營分裂之後,完全可以重新統一。

但係今次選舉,係某方干預之後,仍然未能重新統一藍營,連表面和諧都做唔到,可見裂痕好深。各方一星期前嘅預測,係林鄭可以攞到680至720票(「第一國師」燒山嘅估算)。但係觀乎依兩三日嘅各方放風,似乎林鄭只可以交到400票左右。當然,佢可以係做緊期望管理,到最後交出票數遠超400票。但係姑且相信現有資料,落差嘅200票,就係對方吹雞都冇作用嘅一群。筆者其實好佩服落差嘅200票嘅人。係有名有姓,對方完全可以打壓之下,仍然唔肯交票,實際上勇氣同深黃嘅勇武之士差唔多,都肯犠牲自己利益,捍衛港人利益。當然,淺藍同深黃嘅政治立場南轅北轍,但係依次選舉,或者可以建立某個層次嘅互相尊重。

練老早兩個月已經寫過,今次選舉係北京第一次對地方失控。如果再加上今個星期警察可以出現三萬人示威,更顯示藍營已經唔再定於一尊。無論選舉結果如何,香港今後的情況,只怕無人再可以一鎚定音。對於深黃而言,當中有危有機,絕對係有利發展。不過情況比兩年前更加複雜,淺黃之外,連淺藍或者都係特定議題,可以合作嘅對象。「政治冇永遠嘅朋友,亦冇永遠嘅敵人」,只怕未來幾年,我哋感覺只會更深。