【前言】

馬博士嘅「環保肉」計劃已經推行兩年,市場已經接納「環保肉」嘅存在。

由「環保肉」計畫開始後,全權負責嘅黑影科技集團純利每年以數千億美元計,已經成為全球賺錢能力最高嘅一間公司,稱為搖錢樹一般嘅軍火及成藥公司,至於毒品生意都比唔起黑影集團。

「環保肉」到底係咩黎?點解可以將肉食市場壟斷甚至可以擊敗其他行業成為呢個世紀嘅最令人注目嘅生物科技工程?

#道德撚免進
#此故事無中生有
#指桑罵槐
_________________________________________________________________

肉【一】

2013年平安夜前夕,黑影科技集團一反過去作風,竟然搞左一場公開記者會,而我就係其中一位受邀到場嘅記者。

記者會就係黑影集團內一個超巨型嘅實驗室入面舉行,相信唔止我呢種普通人,我相信好多科研人員以及黑影集團嘅員工都未曾入過呢間巨型嘅「室」。

與其話佢係「室」,我會形容佢係一間展覽廳,規模比起灣仔會展更宏偉;但場內最令人嘖嘖稱奇嘅係,竟然有大量食物提供比一眾紳士名流嘉賓,科研人員同記者。雖然我唔係咩專業人士,但報導科技多年,我都知道室驗室入面講求潔淨,安排大量人無經過消毒嘅人進入實驗室已經令人出奇,更何況係有食物。

但一陣一陣嘅香味的確係令人心動。

場內環境早就變成一個舞會派對,有音樂,有酒水,所有人都唔係好記得呢到到底係咩地方;科學家唔怕死食實驗室入面嘅燒牛肉,我可以理解,但家財萬貫嘅富豪都肯比面食,我都應該試一試。

有酒有肉嘅地方,自然會有人流,我諗過多一陣應該會有女人出黎跳舞。

但事實係令我失望,從布幕行出黎嘅係一個年過50嘅身穿白袍嘅男人同埋黑暗集團主席-張建生。

呢個被喻為廿一世紀最影響生物科技界嘅男人。

張建生38歲,畢業於美國麻省大學,主修生物細胞,遺傳學等。佢唔係一流嘅生物學家,令佢成為一間影響全球嘅生物科技公司主席,最大原因就係佢嘅地產家族生意。

我呢種普通人,問老豆拎十萬搞生意都會比人插我不務正業;但富裕人家,問老豆拎100億黎搞生意就簡單得多,而且我相信佢老豆仲會問佢夠唔夠添。

但二世祖能夠成功亦唔係一件必然嘅事,張建生嘅成功絕對係佢有眼光。最關鍵嘅一項成功生意,就係肢體再生技術。

係開始嘅時候,佢已經完全收購所有科研人員及項目,當時唔少取笑呢個新手將老豆嘅錢倒入去痴人說夢嘅科技研究。4年過去,證明張建生係有頭腦有眼光,雖然再生技術並唔可以將人類四肢完全再生,但佢嘅技術可以令到嚴重神經受損,或者皮膚燒傷等嘅情況超大程度回復。

張建生的確係救濟世人。

對唔住,張建生唔係一個救世主,佢只係一個極度貪婪嘅生意人,好快佢就將再生技術轉到去醫學美容上。的確,有唔少女人認為佢係再生父母,將佢地年老色衰嘅皮膚再次打造成廿多歲嘅樣。

而有唔少人認為其實再生技術其實已經成熟,但張建生為咗賺更多嘅錢,要令呢班女人繼續好似吸毒咁使用呢種技術,每隔數個月,佢地就要比幾十萬甚至更多去保持佢地嘅美貌。

單靠呢項技術,已經令黑影集團半年內賺超過幾億美元。但樹大招風,呢件事亦都引起咗好多嘅批評令到再生技術係市場仍然有唔少嘅阻力。張建生亦唔蠢,為免有影響佢嘅計劃,黑影集團之後都會好低調咁進行收購及研究,有時甚至連成功後都唔會有任何嘅宣傳,會隔開無數嘅公司推出去市場。

可能有唔少反對者,使用梗黑影集團嘅科技仍然懵然不知。

呢個行為亦令我好欣賞呢個貪婪無恥嘅人渣。所以今次佢咁公開搞記者會,的確令到好多人震驚,到底乜嘢令到張建生會一反常態?

因此我開始注視係佢身後嘅男人。
_________________________________________________________________