依兩年港獨思潮堀起，觸發點係對方強行推行文化單一化。由簡體字同漢語開始，近十年香港人發現只要一放低心防，文化殖民就蜂湧而來，香港嘅文化基因被某方勢力強行改變。故此，港獨思潮其中一個主軸就係捍衛本土文化，要確立香港文化嘅主體性，所以強調香港歷史、香港文化、香港電影，同埋傳承粵語、港產片、粵語歌。論述香港現有嘅華夏承傳，確立香港獨有嘅小中華核心，的確係當務之急，筆者完全贊成。堅持本欄以粵語入文，都係略盡棉力嘅一步。
不過香港另一面係華洋雜處。華洋雜處，其實就係現今左膠口中嘅「多元文化」。依個詞語愈來愈臭，主因係深藍以多元為名，赤化為實，要求港人為左多元，容納北方果套文化同價值觀。例如深圳河以北，每年都有人認為聖誕節係外來侵略，唔應該慶祝，反而應該慶祝毛誕。反而香港雖然從來都唔係耶教社會，但係就擁抱聖誕節。聖誕節除左係零售商嘅重要季節之外，尖東燈飾、商場佈置、平安夜唱聖詩，都成為香港嘅集體記憶，係文化基因嘅一部份。
除左聖誕節之外，三月嘅七人欖球賽、十月嘅萬聖節同德國啤酒節、甚至近一兩年先開始嘅日本秋祭，都早已係香港生根。係深圳河以北，連叮噹展覽都惹來官報批評，依類真正多元嘅文化，好難係當地生根。故此，欣賞華夏以外嘅多元文化，實際上亦係抗赤化嘅一步。
其實除左以上嘅幾個活動之外，台灣在港嘅大學生都有舉辦台灣節，唔少國際學校亦有慶祝印度排燈節同猶太光明節。如果香港可以辦成西九紅酒展，點解唔可以開辦印度美食展，以顯示香港對佔人口5%嘅印裔同胞嘅欣賞？如果可以做到商業成功，更可以幫印裔同胞開拓一條生路。日本拉麵係香港愈開愈多，觸發點都係2011年311地震之後，香港有心人邀請左幾間拉麵店來港義賣，反應良好，先吸引當地師傅係香港開店，先逐漸出現正宗拉麵。印度菜館，係香港歷史悠久，為左印裔同胞又好，為左整體香港文化多元又好，點解我地依幾年冇去主動發展依一段飲食文化？
依類尊重少數文化，幫忙使之札根，先係真正尊重多元。口稱支持多元，但將香港現有同可以有嘅歐美、日、韓、台、印文化元素置諸不顧，反而認為本土派抗赤化係排外法西斯，實際上只係殖民幫凶。