新年第一篇,講講年宵當中最多爭議嘅「街口有落16seats」。點解我要留到今晚先寫?因為今晚係年宵最後一晚(編按:已經完結),我而家先出Post對人地影響係最細,何況佢都賣得七七八八啦係咪?

 

睇番佢地喺香港01嘅報道,他表示於較早時已有朋友與麥先生聯絡,希望可找他為商品題字,唯原創字型的麥先生未有答覆,但強調已向麥查詢其小巴牌有否專利,「得悉小巴牌設計係無,而字型係有。」所以林生就上網搵其它字型印落小巴牌,理論上避開哂版權專利嘅問題,而佢都講咗句「我自己上網好辛苦搵字體,所以我唔認同抄襲嘅」,不知幾理直氣壯。諗諗下,如果係咁我以前中學抄功課都唔應該比人話,話哂一筆一劃都係我自己抄落去,用番林生個講法  — 「好辛苦㗎」。

 

創意係咩?創意係麥錦生師傅聯同NGO將小巴牌做埋鎖匙扣,等大家可以掛住個小巴牌出街而又得到原創者同意,而唔係用人哋諗好晒嘅嘢直接出成品然後轉轉字體就叫做有諗頭,正如我唔可以用金庸本神鵰俠侶做主題,改改地方名招式名就當新故推出一樣。你用嚟做二創玩下唔弁利都可能冇問題,但你而家拎嚟搵錢冇問原創者同意就點都過唔去,依點亦唔係一句你問咗人人地冇覆就解決到,喺冇當事人同意下你根本唔應該推出依類產品。

 

睇番毛記電視之前一篇專題,麥錦生師傅喺一六年嘅暑假就有搞過工作坊,講小巴歷史,講自己經歷,仲有寫小巴牌比人。塊牌細細個,你想寫地方名人名詞語都無任歡迎,同「街口有落16seats」嘅產品好似,人地上年就做緊嘅嘢你而家拎出嚟賣仲好意思話係自己團隊諗出嚟,我搵唔到佢哋同名創優品個分別喺邊。口口聲聲講撐本土文化,其實就係靠個本土光環掠水,又唔見你地話會分番錢比麥師傅支持佢寫落去,保護香港文化?如果叫你今鋪搞義賣啲錢唔落你袋,我覺得佢地連抄嘅動力都冇。

 

創意係無價,當中帶嚟嘅價值係無可估計。如果條橋係你諗,你用佢賺一千幾百萬係你本事;如果你係抄,抄著條財路你都算精明。

 

不過死撐冇抄做到好似隊Mr.咁,柒咗啲囉。