無限Refund、上引港女、千歲機場事件、香港人突然變得神憎鬼厭,無論去到邊都成為醜事嘅主角–我頭先係咪講咗「突然」兩個字?唔好意思,其實香港客仆街身為香港人嘅我地一直都好了解,只你礙於面子問題唔肯認。而家咁啱一次過爆咁多單嘢出嚟令大家唔可以唔正視依個問題。

香港人好憎自己俾人當大陸客,因為大陸客自視過高,以為自己有錢大晒,香港人當然唔想俾人帶有色眼鏡去睇。但大陸客氣粗嘅前提都起碼因為財大吖,佢哋態度幾差都好,最後買嘢通常都好豪氣,張單會令你覺得比佢地煩咁耐都值嘅;香港人呢?買一百蚊嘢就要你比一百萬嘅服務佢,最後仲會好厚面皮咁問你有冇咩Discount比佢。唔係講笑,噚日我先見個做人老豆嘅為咗要五蚊入場發哂爛渣去嘈,仲夠膽話依個唔係錢嘅問題(下面嗰句我都廢事講),結果職員一Free五蚊俾佢入去佢嘅原則就唔知去咗邊,即刻笑晒口咁入去。

「依個唔係錢嘅問題」依句由香港人講出口真係搵鬼信咩大佬。

做人有要求好正常,咗錢想有服務都係人之常情,但最基本你要嘅嘢起碼都要合情合理。即係點?例如食老麥要汽水走冰、薯條走鹽、飲咖啡要轉脫脂奶個包要整熱啲。但你會唔會要求畀廿四蚊要食到個巨無霸餐,或者用齋啡價錢飲到星冰樂?人哋唔俾你唔係因為服務唔好而係你要求無理,但唔知點解好多人一上到飛機就好似冇晒常識咁:比經濟位價錢但要坐商務甚至頭等、自己Check in嗰陣冇揀定特別餐但空姐派餐又唔食依樣嗰樣之後又話人服務唔好、起飛嗰陣Call空姐唔嚟就話人忽視自己又唔諗下嗰陣起身有幾危險。將心比己好似冇咩香港人識,自己提出嘅要求誇張離譜拒絕你其實好正常,一啲都唔關服務好唔好嘅事。

如果香港人再唔正視自己做客嗰陣嘅問題,好快唔止香港本土服務業同航空業會討厭香港人,全世界都好快唔想做香港人生意,因為香港人喺佢地眼中就係代表麻煩多多但又唔肯洗錢。我地而家仲笑緊中國人無知,但到時候當我地比中國人笑返轉頭都冇得反駁,再唔改下自己平時嘅態度,我地嘅惡行可能好快比中國人更多同更出名。