爛還爛心未曾爛 – 陳奕迅〈爛〉

點解會想寫講呢首先?其實就自己想搵果陣就冇心諗冇理由架隻碟咁舊都冇人講同解?而自己最近就係呢方面下緊功夫,亦都想人關注下靈修呢個話題,就想借歌詞說義咁啦。

眾所周知,林夕係信佛嘅,佛好睇重輪迴同前世今生嘅概念,亦都重視活於塵世本是苦既道理,透過一次又一次既輪迴令我地既靈魂成長同學習,從中得道看淡世事,繼而無求,咁就可以由輪迴入面走出黎成佛。(自己唔係佛教徒唔講到咁多亦希望有有心人補充)

總括而言成首歌嘅【爛】就係代表人生同輪迴中所面對嘅困難、痛苦同歷練,一切既事都係命、因果,目的都係想你:留低擊傷你的石頭,從錯誤裹吸收。而最後要看開世事先能夠得道升天。

(蛋殼被逼爛 才能出世打開眼 世上無敵 必需不怕爛)
生活喺俗世,特別係今時今日社交平台同資訊科技發達、物質豐富。我地一舉一動都會招人話柄,亦都好容易搵到物質去滿足自己,打機、飲酒應有盡有。加上社會吹捧呢種文化,變相我地都習慣借呢啲方法去填補心中空虛,每日如是。特別係大時大節個個去玩去chill,做人少不免比較,就有樣學樣出街玩po相,可能唔係好enjoy,但只係想求個like,或者有人陪下冇咁悶,同人比較果陣都冇咁失色。(想搶眼 只穿禮服才懶)

(那煙火未燒爛 如何感覺像元旦 徹夜糜爛吹散紙碎渡聖誕)
唔使自己諗,人哋認同我又開心咪得!就係咁,形成左惡性循環,更加重視物質同別人嘅眼光,慢慢失去左本性,慢慢要建立第二個形象去取代自己,因為想受歡迎想受愛戴,表裹不一。唯獨返到屋企或者自己一個人果陣,唔使應酬唔使活喺大眾之下先可以做返自己。

(將制服撕爛 如像釋放了花瓣 將宇宙解散 都不會怕孤單)
歌詞將制服代表表面,而我地解放緊件衫果陣,其實都解放緊自己同個腦,唔使再強裝享受,唔使遷就人,成個世界就只有自己。而當我地睇得透道理果陣,我地會享受孤獨,無懼比較,唔使假裝、唔使應酬,就只有自己。孤單化為一個思考嘅機會,深思人生、存在意義,又或者只係搭吓電車、睇吓戲,做自己鍾意又冇乜人願意一齊做既事。

如果我地一路唔走去自己既comfort zone、一路為人地而活,會失去自己同人生。要放低自己嘅成見同舒適,走出去認識世界同自己先會發掘到世界同自己既另一面。
(著住靚衫 怕著爛怎去盡興玩)
當我地踏左出去之後就發現好多困難或者痛苦,只不過係自己睇唔開同執著。得之我幸,失之我命。唔係你既就唔係你,唔使強求亦都唔需要擔心,世上萬千人物,豈可盡得?

(化石溶爛方知天意沒法挽)
而最重要係要喺當中學習同了解自己,清楚自己並接納自己,無人完美,要對自己有信心同滿意方能令自己不受外來影響,心如止水。

(爛還爛 心未曾爛 爛還爛 不信肉眼)

(填飽最後晚餐 肉身也會腐爛
萬物溶爛 一念無限
曠世巨鑽 不過是炭
迷戀也大概可 海枯到石爛)
去到最後會睇清,世事不過浮雲,所有事物都會腐爛、留不住、留不得;所有事物不論貴賤,本質都一樣,都係平等。唯有自己既信念同靈魂係不死,人生所有追逐都只不過係有限追無崖。所以修身淨心,方為上策。到我地經歷過痛苦,經歷哂各種【爛】,置之死地而後生,就會明白世事無常。

(蛋殼被逼爛 才能出世打開眼
世上無敵 必需不怕爛)
結尾既兩句係終結亦係開始,係物質生活嘅結束、靈性同精神生活嘅開始。透過生活嘅困難去逼爛我哋嘅保護層,用真我去接觸世界,進一步學習同修行,再打開我哋第三眼同宇宙連結。最後內心嘅滿足令我地無懼世事變改,周遭嘅人事就好似雨點打落湖面,引起波動但終會平復,咁就能夠達至世上無敵嘅境內。至去到心如止水,首先就要勇於接受困擾、面對痛苦,或者應該話係接受現實。現實從來都唔係想像中美好,有留意deep web同陰謀論嘅朋友應該明白我嘅意思。

補充返少少 「蛋殼被逼爛 才能出世打開眼」 呢句
密宗有樣野叫脈輪,全身共有七個,而第三眼即松果體就係當中既眉心輪,好似二郎神咁,係用黎接駁上天同其他維度既工具,陰陽眼係其中嘅功能。透過修練去連接七個脈輪,繼而打開第三眼同頂輪。不過唔多講啦因為依家都好多人討論,有興趣可以自己搵,但你要明白欲速則不達,能量係要透過經歷去累積而運行,所以學識左心爛先啦。

活在當下,唔到我地擔心既唔使擔心;唔到我地控制既唔好諗住左右,用平常心看待所有事。
完!