肥料層

「唉,我地呢啲草根…」呀明又係抱怨。

 

呀明岩岩係公司睇完啲什麼研究報告,大概就係分析香港嘅貧富情況,有錢人,中產人,基層大約係做咩職業,收入有幾多,最重要嘅係佢地仔女將來嘅生活大概會係點,由於文章太長我係簡單總結一句:成功需父幹。

 

呀明同我同年,已經有2個仔女,我真係好難想像大家收入一樣但佢竟然可以養得起一對仔女。

 

「無架,我銀行KEEP得幾十蚊係到。」呀明好清楚,自己已經所有嘢投資哂仔女身上。

 

點解用「投資」呢個字?因為呀明同我老豆老母,同所有嘅父母一樣,會有「望子成龍」諗法。
期望他朝某日自己仔女會出人頭地,唔使再好似自己咁,搵朝唔得晏。

最起碼,佢地唔好再捱窮,呀明係咁諗。

 

但係份報告就完全摧毀哂呀明呢種咁天真嘅諗法,因為內容就係話

「只有少數嘅基層人口可以透過專業知識或者完善嘅理財以流向中產,而絕大部份人口仍然要停留係基層。」

 

呀明其實知道,只不過正如每個父母都係認為自己啲仔女或者會有唔同,或者佢會特別聰明,特別有運,可以離開貧窮呢樣嘢。

 

「唉,我地呢啲草根…」呀明又係抱怨

 

我終於忍唔住:

「你咁睇得起自己叫自己做草根?」呀明大惑不解

 

「草根係咩?草根就係支撐住全棵植物,最重要嘅一部份,默默地付出,雖然無人知道但仍然有佢嘅位置;閣下有位置咩?我地連住無撚得住啦!

我地呢啲叫肥料,有無你都得,你覺得自己付出咗好多咩?就算係,人地都只會厭棄你又臭又污糟,恨不得抽乾完你再一腳踢開你。」
我講完,大家都無出聲。

 

直到無耐,富爸爸見太靜又講左個笑話:

 

有個後生仔好驚青咁返到屋企,老豆擔心到不得了。終於後生仔開口:「呀爸,我搞大個左人地個肚呀!」

 

呀爸立即鬆一口氣:「咁咋!?我幾驚你話想讀設計呀!」