川普當選,部份支持者將之比美成26年前列根當選。比諭係咪合理,見仁見智。但係美國右派,每逢選舉都高舉列根,卻愈來愈普遍。好似BBC之前就報導過,今屆總統初選,16位共和黨候選人都有係辯論或者重要演說之中,號稱自己效法列根。列根係立場偏右嘅美國人心目中,就係代表希望。

近二十年,美國國勢如日中天,大家未必記得,係列根當選嘅1980年,其實美國人對前景係好悲觀。地緣政治方面,美國越戰失敗,同時蘇聯成功佔領阿富汗。就連伊朗政府,都斗膽綁架美國大使館成員,釀成長達幾個月嘅外交風波。美蘇兩者之間,對比明顯,彷彿證明民主制度比唔上共產主義,自由世界衰落,似乎無可避免。

長期來睇,雖然並未出現核戰,但係幾個大國都愈起愈多核武器,假如稍一不慎,爆發核戰,人類隨時會滅亡。所以當時嘅專家,大部份認為蘇聯將會永遠存在,美方最好嘅策略,就係唔好挑戰蘇聯,永續恐怖平衡。「共產黨最開心」成為政策考慮,並非始於今天。

經濟方面,美國國內長期滯漲,民眾工薪愈用愈唔襟用,生活逐漸緊拙。石油禁運,導致燃料短缺,每次入油,都要大排長龍。另外,日本德國工業逐漸追上美國,而且係唔少領域開始領先,更令人擔心美國嘅長期狀況,係自由世界之中,都未必可以繼續當家。當日係第一次美國人對未來失去信心,認為下一代嘅生活,將會比唔上自己一代。連卡特總統都係電視講政府對經濟束手無策。美國似乎只能夠向現實妥協,逐漸失去光輝,最終成為巴西、印度一類,地域廣闊嘅二流國家。

列根係演員出身,故此唔少當代人都覺得佢無腦。但佢係二戰之後,就長期擔任荷里活工會主席,開始接觸政策辯論。佢原本係經濟左翼,相信政府理應運用公權力,保障例如工會成員嘅小巿民。後來右轉,成為信奉小政府嘅右翼共和黨。佢曾經擔任通用電器代言人,巡徊全國演講,發展出自己嘅論述。

1967至1975年期間,佢擔任加州州長,就試行削減公共開支,大減薪俸稅等政策。另一方面,佢亦曾用州警察驅散示威,係當時已經有強人形象。

係1980年當選之時,列根已經68歲。外國人記得嘅反蘇政策,實際上係1984年後,列根第二次任期之內先逐漸成型。當年,第一次選舉嘅競爭主軸係一邊減稅削福利,一邊增加國防開支。前者目的係促進經濟增長,而後者則係重奪地緣政治話語權。綜合兩者,則係希望美國重新上路,重新成為聖經比諭裏面嘅「山頂光明城巿」。

後來係列根總統圖書館,列根夫婦銅像後面,就係佢最出名嘅一句話:「美國最好嘅日子尚未出現;我地最值得自豪嘅日子尚未出現;我地最光輝嘅成就仍未出現。」(America’s best days are yet to come. Our proudest moments are yet to be. Our most glorious achievements are just ahead. )

世事常變,滄海桑田,總有三衰六旺。民族面對逆境,會係長期衰落,定係重新振興,當然有一定嘅客觀條件,但係民眾信心,亦好重要。列根主政八年,爭議唔少,政績長期效果亦有所爭議。但係佢成功穩定原本可能崩潰嘅民族信心,停止民情繼續滑落。之後先有空間,審視諸般「不可能」,搵到出路。
維持民族自信,係政治領袖同官僚,政客嘅最大分別。官僚行事,首先審視可唔可能,難唔難做。政客行事,以勢利導,每件事嘅目的,都係鞏固或擴張自己嘅政治能量。唯有政治領袖,則瞭解自己需要垂範天下,一舉一動都會影響民情。

羅斯福講「只有恐懼,才最值得恐懼」,邱吉爾講「千年之後,此時此刻將成我族最光榮之時刻。」,甚至林肯講「民有民治民享之制度,勢將永續存在。」,等等豪情壯語,都係國難之時講出,就係因為只有信心動搖之際,如此說話先會鼓動人心。而係信心薄弱之際,仍能宣傳正面,先更顯出領袖風範。
《武經七書》中嘅《三略》有一段係:「軍井未達,將不言渴。軍幕未辦,將不言倦。軍灶未炊,將不言飢。」將軍係一軍表率,過份投訴,士氣將會低落。政治領袖亦要係政策同立場之外,鼓動民眾信心。依類型嘅領袖,環顧藍黃兩營,深淺二色,有幾多個?