最近開始有人稱呼「經合法選舉產生嘅民意代表」游蕙禎做漢奸,一時彷彿佔據咗道德高地。但係若然矢志香港獨立,被稱漢奸,其實並非壞事。

 

先論漢奸一詞,準確度其實非常之低。現時通行意思,大約係指身為中華民族一份子,但又損害中華民族利益嘅人。但係正確來講,依類人應該被稱為「華奸」。漢奸係指損害漢人利益嘅漢人,只係中華民族嘅其中一族,依個詞語本身已經係大漢沙文主義,雖然口稱中華,但實際上係漢族主義。分唔清漢族同中華民族,實際上就係現今民族問題嘅根源。到底係現行民族認同之下,藏族、蒙族、同維吾爾族可以保留幾多非漢人傳統,而仍然屬於擁護中華民族呢?

 

反而「港奸」,語意更為清楚,係指出賣港人利益嘅香港人。語言裏面有「漢奸」同「港奸」,卻無「華奸」,就係明證,漢人同香港人都係自然而成嘅民族。反而中華民族係清末梁啟超所創,經過歷代政客同野心家宣傳,本身並無實際根源。

 

另外,漢奸一詞,含有出賣自己人嘅意義。假如係兩國相爭,則無出賣嘅問題。中日戰爭,汪精衛被稱漢奸,但係日軍並非漢奸。而且出賣嘅係民族而非政府,故此蔣介石可以話毛朱周鄧係共匪,但唔會話佢地係漢奸。

 

中華人民共和國治下民眾,由四九年開始,經歷咗幾多事件,係同期嘅台港澳人未有經歷?係黨國體制之下,有幾多傳統華夏思想,已經被共產主義,甚至鄧氏實用主義所替代,令中華人民共和國治下民眾,思想承傳已經同港人所承傳嘅華夏文明,有所區別。

 

當現行體制早將傳統華夏文明斷送,反而周邊地區,包括日、韓、台、港,承傳文明更多,就係所謂嘅華夏變態論或者小中華論。假如依類論點成立,咁調返轉頭,脫離現行體制,先係真正愛護華夏文化。依個論點係陳雲系城邦建國嘅重點,亦係日韓承傳東方文明嘅基礎,甚至係蔣介石係台灣弘揚傳統文化嘅原因。因親北京而強行將兩地接軌,反而破壞香港現有承傳,先係真正出賣華夏嘅真漢奸。

 

正如練乙錚今個禮拜係《氣短集:特府鬥港獨 梅花間竹誰贏了?》所寫,依兩個月嘅發展,令香港人一改以前極之模糊嘅民族認同,迫使我地深思中華民族、漢族、香港人等概念之間嘅關係。劉仲敬等評論家,亦以香港做切入點,思考整個中華民族嘅歷史同前景。

 

香港雖小,但係過去百年,華洋雜處,資訊流通,往往民眾思想,都比東亞其他地方領先一截。故此,開埠以降百五年,香港幾次改變東亞歷史軌跡。正如我哋敬愛嘅特首所講,香港人需要承繼孫中山先生嘅遺志。勇敢擁抱香港每一次嘅歷史使命,或者就係我哋一輩嘅責任。