《90後銀行小妹甩轆記》- 瘋狂客戶系列 vol.4 JM tone寸嘴 OL

今期流行JM tone,其實小妹在分行也遇過不少JM姊妹,其中一位最極品的,依然令我留下深刻印象。

 

話說當日極品OL一入分行,濃烈的香水味已經傳過來,有可能是Chanel No.5?

 

我望咗過去門口,想睇下究竟是何方神聖,呢個時候娜姐咁啱經過,就比件極品OL捉住咗,「ExQuse me,你同我open個account柒。」嗱,呢位小姐,須知分行職員都有分高級同低級,高級如娜姐就剩係接熟客,低級如小妹先會幫你開下戶口。

 

高貴大方嘅娜姐並無黑面,就指示佢可以搵我幫手。於是,極品OL藐嘴藐舌咁行嚟我度坐低咗,並好自然地將個愛馬仕包包抱喺大髀上面,再唔覺意撥一撥秀髮,等我留意到佢嗰隻可能有2-3卡嘅鑽戒。哇,咩料呀?將幾廿萬孭喺身上,真係唔怕比人打劫?

 

「我想open個account柒,做定期。Actually,我好busy,唔該快些少。」點解個個開戶口都未開先催?

 

「哦,好呀,咁我同你登記返啲個人資料先。」我接過佢張身份證,繼續問:「請問老小姐做盛行呀?」

 

「叫我Miss Lo。我喺實Qurity firm做marrrketing。」無錯,JM tone招牌捲舌R出現了。

 

「麻煩提供一下公司資料登記返。」

 

老小姐小心翼翼打開她那卡其色的手袋,用塗了gel甲的纖纖玉手取出一張卡片,遞給我。卡片上面寫著title:VIP Service Executive。

 

「咁即係咩?」

 

「Well~actually我公司啲client柒都係VIP,即係大客,我always要同佢哋contact柒,要聽下佢哋course (calls?!)。」咁同marketing有咩關係?宜家份份工都話自己係marketing嘅喂!

 

「係喇,唔知您有無親友喺我哋銀行都有戶口呢?」

 

「唔洗啦。」老小姐好心急打斷我說話,驚死我會sell佢。

 

「哦,唔要coupon,唔緊要。」

 

「Wait,你話乜Qpon話?」

 

「其實係想話如果有親友介紹開戶口,會有coupon送。」我真係太好心地。

 

「咁要點做呀?」

 

「要填返少少親友資料,咁啲coupon會寄比佢。」

 

「啊?唔係比我㗎?」

 

老小姐思考了三秒,即刻話:「啊,我有個acQueentance (acquaintance?!),你等我一陣。」

 

「喂?Betty?……係呀,我準備同我mother-in-law同father-in-law飲茶。不過呢,宜家係banK開緊account柒,啊,我記得呢,你係咪有呢間banK account柒㗎?……嗯嗯,咁到時會mail比你,你幫我keep起D Qpon呀!Thank you你!」傾完之後,老小姐不自覺地流露出滿意嘅笑容。但我已經等咗佢10分鐘,其實我都好busy。

 

「係喇,你可唔可以快些少?我趕住同我mother-in-law同father-in-law飲茶。Mother-in-law同father-in-law已經等咗我好耐。」我打字都覺得好攰,點解佢講咁長唔覺攰?

 

「Miss Lo,您真係錫您parents-in-law喇。」老小姐聽到呆咗一下,可能係佢估唔到我原來都識英文,又可能係佢估唔到有一個英文詞彙可以概括佢老爺奶奶。

 

老小姐走咗之後,娜姐第一時間走埋嚟問我:「阿妹,頭先條女咩料呀?」

 

「無,做接待員啫。」

 

「又係啲冇料扮四條呀!」

 

最後,勸喻一句,如果無JM的臉孔,千其唔好用JM tone。