《90後銀行小妹甩轆記》- 洗舖

當分行得小貓三四隻時,我悠悠閒同其他同事吹水,老闆可能認為我太得閒,又有新任務派比我喇。

「老闆,有咩吩咐呀?」實唔慌有好嘢益我啦。

「Bella,我知你好勤力打call,但Loans條數都係爭啲,你覺得可以點樣搵多啲生意返嚟?」咦,老闆無啦啦出題考我嘅!

「再去派傳單?」

「答啱一半,今次要去派埋卡片。」

「去邊派啊?」

「你覺得邊度可以搵多啲生意返嚟?」我覺得老闆好鍾意引導我思考囉。

「um…如果要搵啲有需要借錢嘅人,我覺得係去馬會派!」我胸有成竹自信滿滿地回答。

「啲賭仔過唔過到TU都係一個問題。」老闆滴汗中,終於放棄問問題:「我想你幫手去行下啲地產鋪,你去同啲經紀打下招呼,順便派下啲單張啦。仲有,我會叫Benson帶住你架啦。事不宜遲,你宜家同佢出去啦。」

我突然醒起一樣好重要的事!

「老闆,宜家一號風球喎!」

「出面好好天呀!一滴雨都無,放心啦,暴風雨前夕都係非常平靜嘅!」

「⋯⋯」

老闆見我不作聲,又影帝上身同我分享佢當年啲威水史喇⋯⋯

「我當年啱啱入行,我都要成日出去洗舖。我好記得,有一次我發緊燒,個天仲落緊大雨,我都擔住把遮繼續堅持去派。你知唔知呀?」老闆瞪大雙眼,表情極度浮誇「我差啲暈咗係條街度!(下刪一千字)好彩,最後我同啲經紀變咗friend,佢地都refer唔少mortgage過嚟!」呢件事相當有嫌疑,咁宜家啲相熟嘅經紀去晒邊?

最後,我一臉半信半疑的表情離開老闆房,同師父Benson孖咇出去洗舖啦。

我哋去到分行附近嘅地產鋪,發現其實日頭好少人,得一兩個坐係度,其他應該出晒去搵客或者帶客睇樓。

雖然都幾odd,但有任務在身,我哋都免為其難逐一入去派卡片,介紹下自己:

「你好呀,我哋係XX銀行㗎!宜家我哋啲按揭做緊promotion⋯⋯麻煩幫幫手介紹下,多多關照呀。」

大部分經紀都「哦」一下,叫我哋放低卡片,就無再理我哋。又或者,有啲更加係由頭到尾連眼尾都唔望下我哋,只有少部份會有興趣問下啲按揭利率。

當然,做得銷售行業,非常現實的醒目仔女們第一時間會問核心問題——「你哋介紹費有幾多?」

其中一位操內地口音的經紀姨姨聽罷我們的費率,即刻霸氣回覆:「唓,咪同邊間邊間一樣,邊間邊間仲高過你哋啦!我點解要介紹比你哋呀!」哇,聽完簡直傷盡少女心,即刻走都走唔切。

好快就洗完舖啦,難得出咗街,我同Benson去食個Tea先返行是常識吧!