李生一出現,全場記者都馬上包圍住佢,李生慢慢咁坐低而在場記者都被安排到自己嘅位坐低。

「各位記者朋友,今次我地嘅新樓盤《御。柯房宮。豪門》嘅出租情況相當理想,特別係我地今次推出二人單位特別受到一眾新婚嘅年青人歡迎。

呢次嘅二人單位平均呎數由50呎至到200呎,我地考慮到香港居住環境比較少接觸大自然,每個單位嘅露台面積都大約成80至100呎,仲要送埋一盤植物。
至於我地三層天台獨立屋,最大嘅單位有成300呎,三層即係1200呎!都可以算係豪宅之中嘅豪宅!而且佢嘅出售價係破咗60年黎香港賣樓嘅記錄!」

一陣熱烈嘅掌聲過後,李生就示意記者可以發問問題,香蕉記者企起身。

「李生呀,今次《御。柯房宮。豪門》嘅天台獨立屋除咗打破咗咁多年黎香港賣樓嘅價錢之外,你地今次嘅最細單位同樣都打破紀錄啵。根據資料,你地最細嘅單位係10樓K室,一個30呎嘅單位。一個30呎嘅單位,我地係市面上都稱之為劏房,唔知李生你點睇呢?」

李生馬上同身邊嘅智囊低頭商討咗幾秒就開腔:「多謝呢位記者先啦,其實好多人都一知半解。呢個30呎嘅單位其實由一名意大利名師所設計,佢嘅設備全部都最先進嘅科技。

基本一般人嘅食訓柯沖涼等等,都可以一次過係呢個直立式單位到用我地提供嘅最新科技完成,而且呢個科技係我地黃江實業買斷嘅專利,市面上短期都唔會有相關嘅商品出現。仲有冇其他?」

另一名記者又開始提問

「李生呀,黃江實業已經壟斷哂全香港嘅市場,你地賣嘅樓又越黎越貴,好多人指你地係賺埋啲不義之財,令到好多人都無地方住,唔知你點睇呢?」

李生又再次同身邊嘅智囊傾計,今次明顯李生已經招架唔住,由身邊嘅智囊直接發言。

「呢位記者朋友,你好。我係黃江實業公關主任,張先生,關於你頭先嘅問題,其實係好主觀性,始終我地都本住『人人有屋住』嘅心態黎營運公司,我地每次一項發展都係做到貼心,貼身,貼地,呢三樣原則去做。至於你話有好多人都無地方住,我相信呢樣嘢我就唔認同啦,頭先各位記者朋友先至岩岩訪問完好多成功交咗租金上期嘅市民咋啵,哈哈哈。我落去下一個……」

突然場外有一班市民衝咗入黎!佢地手持標語係到大嗌:

「騙子!!!吸血鬼!!!人渣」

「個陣你地賣樓比我地呀!根本全部都係豆腐渣黎架!」

「嗚!!我個仔就係我返工個陣比層樓壓死架啦!!」

由於場內一面混亂,李生同佢身邊嘅智囊馬上被保安送走,而記者們當然唔放過呢個機會,正當記者想訪問其中一名市民之際,電視畫面就轉播:

「五糧液!!中國的五糧液,世界的五糧液!!!!!」

電視播完哂重覆咗10分鐘嘅五糧液廣告之後,電視入面係直接播放一名主播用普通話去訪問一名房屋高官嘅內容。

主播:「請問關局長對現在的房價,有什麼看法呢?青年人是否仍然有能上向上流嗎?」

關局長用佢訓練左好耐嘅北京腔講話:「這個嘛,就是啦,你知道啦。」

「這個嘛,是香港人的年青人總之不太在事長輩的說話嘛。就是啦,喜歡搞東搞西,不太明白社會需要些什麼,國家需要些什麼。你知道啦,我們做人做事都要為大局著想啦。」

主播發現局長仍然未答到問題核心,就再次問:「局長,那你對房價方面有任何評價嗎?因為現在社會已經絕少有人可能買到房子,就是這十年內,大家已經將目標降至租房子,一般人工作的年薪可能需要儲蓄大約5,6年才可以租房子,你對這樣的情況,又有咩任何的看法嗎?」

「這個嘛,就是啦,你知道啦。」關局長又重覆住呢幾句。

「這個嘛,我們做父母官的就是順從民意同樣也要照顧著國家嘛。就是啦,如果只是從一般人的看法看社會,社會會亂的,國家也會亂的。你知道啦,我們首先要擴闊咱們的眼光才能夠建設國家嘛。」

主播見到局長呢種官腔講話,開始頂唔順:

「這麼,局長那你對我們的新的領導人有什麼看法呢?」

「好呀!就是好呀,出色嘛,他呀,為人爽快做事準確,無什麼架子!……」突然關局長電話嚮起,主播就示意暫停節目。

「喂!」關局長終於用返廣東話。

「Baby!冷靜啲,邊個蝦你呀?乜呀?香蕉日報記者?佢點蝦你呀,唔怕啦。你依家係傑青黎架啦,大方啲啦!…… 我老婆今晚同仔女去旅行,不如你今晚過黎我到先傾啦。」