Ban鳩HKG+,林祖舜自掘墳墓

林祖舜打壓第三方高登瀏覽apps hkg+,身為一個曾經係613事件對抗草泥馬嘅前高登會員(佢曾經係admin公告點過我名做搞事份子架,真係榮幸),有少少感受想發表。

而家風頭火勢,林生如無意外都係用返個招「龜縮大法」—由得你班高登仔屌餐飽,過一排高登仔淡忘咗就求其出篇公告話自己點有苦衷乜乜乜。而高登仔本身就係香港人,香港人搞抗爭特色係咩相信各位讀者都好清楚,所以呢招由女夜鬼事件、613事件到Lihk事件都係咁有效。

但係有效歸有效,唔代表呢招冇副作用,我當每次草泥馬搞事令高登有百分之五會員出走,其他九成五會員繼續含淚,每一次影響都好輕微但係當一次又一次,5%復又5%咁積累落去,條數都幾襟計。就有如你見CCTVB 啲劇仲係收視之冠但係四十幾點嘅情況已經好少見,更多係三字頭甚至二字尾嘅平均收視,高登同無線都一樣係食緊老本,係新媒體進逼底下不求改進增加新收入,反而只識打壓弱者嚟保住固有收入。

但無線同高登唔同嘅係人地係上市公司而且處壟斷地位,大把老本食;而高登只係由一個IT界選委都選唔到,黑眼圈大過個腦嘅垃圾IT狗領導嘅科林,隨時可以被取代,「上討論區」呢個潮流慢慢消逝,而家係一個Facebook可以隨時搞直播嘅年代,無敵神駒、瓊姐、向西等等都開始唔再需要靠高登draw attention,呢個「全港最受歡迎嘅電腦資訊網站」就只會變下一個ICQ/MSN 。

而且今次hkg+事件同之前有少少唔同,女夜鬼同613事件係同公義有關,香港人(即係高登仔)對公義有幾著緊又係大家心照啦,冇咗個account咪開個新囉,唔罵女夜鬼或者百份報咪冇事。Lihk事件最後就轉為收費apps了事,咁有得繼續用apps自然更加冇所謂。

但係而家hkg+係連想做收費apps都唔得,直頭冇撚得用,焗人用個垃圾官方apps。愈嚟愈多人用手機去上高登係大勢所趨,用開hkg+要轉去用官方apps就有如屌開三上悠亞要轉同欣宜敦倫一樣不可接受,林祖舜幻想個班人會復古用返大牛龜電腦上桌面版高登更加係天方夜譚。呢次同公義無關,係根本唔user friendly 嘅問題,高登仔就算想含你個官方app都含唔落口,想改變用戶習慣?唔係唔得,如果你係Steve Job的話。不過你林祖舜屙督尿照下先,你除咗生癌之外應該無樣野有機會似教主(係,我係人身攻擊)。

可以話高登根本冇可能會得到hkg+個部份用戶可以帶嚟嘅潛在廣告收入,無論駛唔駛橫手搞hkg+結果都係一樣。識得玩嘅,應該係改變賣廣告模式,100毛都唔再係咁戇鳩擺個banner係個網呃你click,而係將廣告融入product之中,你林祖舜就仲沉醉係咸豐年嘅賣廣告方法入面,等死啦。

呢次hkg+風波唔會一下子收到高登皮,但我估計傷害性會比之前嘅風波要大,如果之前的事件導致高登少咗5%嘅會員,呢次至少走多一倍人去到10%,剩低含淚用高登官方apps嘅,都應該有一部份頂唔順最後少咗上高登。林祖舜會發現佢呢種殺雞取卵嘅行徑只會令廣告收入短時期上升,長遠講個收入會跌得更快—不過或者佢準備掠埋最後一轉然後賣盤比親中財團咁又另當別論啦。

至於有班高登仔話轉去膠登,身為過來人我奉勸一句:你地同個班以為台灣好好就移民過去嘅港豬一樣,好快就會夢醒,算吧啦。