冇錯,相信有唔少標題黨已經就我個咁富有歧視意味嘅標題鬧緊我唔係人,仲諗住寫信去平機會告我添。

但點解我會話我好憎抑鬱症患者呢?

除咗我本身係有好嚴重嘅抑鬱症傾向(冇醫生確診唔會用患上)之外,仲因為我係一個長期抑鬱症患者嘅家屬。

相信大家都會有仇老嘅時候,除咗因為買咗車飛坐關愛座被佢地批判,成日投票俾左膠含X, 屈完你做野仲要話袋咗錢入你袋之外,仲可以因為佢地有一啲極度需要被照顧嘅疾病。

我唔係話老人家有病唔應該被照顧,亦都唔係冇孝心,只不過唔係所有老人家都有資格用病嚟做藉口。

我婆婆患咗抑鬱症好耐,由我出世開始已經患上咗,而我作為成個屋企第一粒孫當然要受到佢熱烈關注,我同佢仲有呀公一齊住到我小學五年級先走得。

佢對我都算好,成日煮我鍾意食嘅野俾我,成日同阿公帶我周圍去,係咪好好呢?

不過通通都係佢冇發病嘅時候囉。

先唔講佢成日賭錢,我凈係談論佢發病果陣同阿公打架,係咁鬧我阿媽不孝明明我阿媽已經咩都俾曬佢又係佢賭輸曬之後嘔俾佢再賭過然後佢有咩唔舒服即刻陪佢睇醫生etc.

係我7歲果年佢仲攬住我當住一眾親戚面前話要死添,仲有我話要番去同媽咪住之後佢當街發癲話阿媽搶走我。

係呀,佢係有病呀,咁又點?

佢果啲賭癮同唔肯食藥唔係病喇掛?

仲有我依家先過咗17年嘅人生,係極度垃圾嘅政府管治之下生活,日日俾泛民出賣,仲要對住一次定生死嘅文憑試,我點樣分身孝順佢? 我冇病咩? 我都有,我都會唔開心(應該話冇開心過),我都日日想死,但我唔死得,因為我要對住佢,因為我唔可以留低我媽咪對住佢,我舅父近年又患上思覺失調,阿姨又住得遠,公公又㩒佢唔住,我好驚媽一個人對住佢,我好驚佢傷害我媽媽。

所以我好憎佢,同時我都好憎我自己,因為我有日都會變成佢咁,一個厚顏無恥嘅人,一個講死講咗20幾年都未實行嘅衰人,
一個將我物化將我打沉嘅親人。

自我懂性以嚟,係佢每一次發病嘅時候我都好想同佢鬥癲,同佢鬥尋死意志大。

你無辦法想像我點樣忍受住我呀媽十幾年對仆心仆命之餘仲要俾佢鬧,我要孝順佢咁我呀媽呢?我係咪唔駛孝順佢,仲有我爸爸呢?憑咩佢要將我變成一件物件,等我細個仲以為媽媽唔同我住係因為唔錫唔想要我?

不過我都要多謝佢嘅,我嘅筆名我寫嘅野我嘅病都係佢賜俾我,冇佢我都點會有抑鬱啫~

佢今日又輸曬啲錢番嚟,然後對佢啲仔女講咩久病床前無孝子,明明個個都咁錫佢,俾咗咁多野佢,點解佢仲要咁對我地? 生命無常,有好多人意外喪親,我一直好想同果啲人講:「不如我攞我婆婆幫你地交換番個親人番嚟」。

點解我要係白頭叔叔離開議事廳之後花咁多時間打依篇文出嚟?

冇,發洩下啫,發洩下果種係房聽到呀媽喊曬口咁係電話度問呀婆佢係咪做得唔夠好唔夠孝順嘅無奈啫。