香港打風,係一件好轟動嘅事,往往連個風都未成形之時,某泛民報章就已經引歐美一週預測去大報某個風又直插香港云云,唔理準唔準,最緊要有noise。於是FB Whatsapp就日日有人睇實天文台,返工lunch放工都睇,睇下天文台幾時掛風球。你身邊會有一兩個朋友,會睇d專門嘅氣象網站,睇圖表睇分析去估算個風會點,share埋出嚟,大家睇咗多數comment就係「咁到底打唔打8號?」「有無假放?」。

香港選舉,亦係一件好轟動嘅事,上次連最後邊個真係出嚟選都未知前,某泛民教授已經用雷動計劃去話你知要投要棄邊個云云,唔理點推舉,最緊要多一席。於是投票個日FB Whatsapp就全日有人等教授指揮,總之未投票就睇。你身邊有一兩個朋友,會睇下參選人理念同政綱,再睇埋佢過去做過咩share埋啲來龍去脈出黎,大家睇咗多數comment就係「咁到底佢點先做到?」「佢有勝算咩?」。

咁多年大家邊睇邊鬧天文台,只有好少數人會自己分析局勢,寧願單向去接收天文台嘅機械化單一資訊,都唔會去花時間為未來思考。可能香港確係福地,年年打風都唔似其他地方咁多傷亡,但極端天氣下風暴愈來愈多,你問下次會唔會打8號?我話下次一定有雷動,香港人愛死了,也習慣了。