選舉結束,有班人係咁抨擊選民的集體配票行動,有的人更離譜到話配票反民主。我自己都唔鍾意配票,我更一直呼籲人唔好理乜嘢民調,走入票站按自己本意投票。但係,分析問題時,不能夠按自己個人喜惡出發。

要評論一件事,是否反民主,首先要講乜嘢係民主。民主就是多元聲音,尊重不同人的抉擇。選民做投票決策時,原因可以是多元化的。有的人喜歡用「肯定法」去投票,即是選一個自己喜歡的,然後投佢;有的選民卻用「排除法」去投票,即是先排除一堆自己不喜歡的候選人,再在喜歡的一堆中,排除自己認為勝出機會細的候選人,然後走入票站投票。

而「配票」和「棄保」,就是「排除法」的一種體驗。而「配票」又比較特別,通常過程中會先篩走一堆討厭的名單,再與朋友或家人等一起商量,在一堆可選名單中,大家分配各投一個名單,期望各個名單都可以當選。但點都好,「配票」過程總會有取捨,選民會放棄投某某候選人。

雖然我一直用「肯定法」去投票,唔鍾意「排除法」,跟人商量「配票」或「棄保」,但如果有候選人自己輸左,或選民見到投票結果唔合自己心水,就話「配票」「棄保」行動違反民主,剝奪選民選擇者,真係好白痴!

死忠粉絲不會配票

首先,候選人的死忠支持者,根本不會參加配票,實投你一票。參加得配票的選民,其實佢地根本唔係你的死忠支持者。佢地在配票行動中,選擇放棄你,本身就係一樣民主選擇,配票又如何反民主呢?

建制派的「配票」咁多利益怪招,真的有機會違反選舉公平,先至要正視。

民主派配票行動自由參與

但民主派選民的配票,自由參與,我睇唔到選民係被迫去參加像「雷動」這樣的配票行動,跟「雷動」建議去投票又唔係有獎品。選民自由參與,又點違反選舉公平?

你作為候選人,選民咁容易就可以因為「配票」「棄保」就離你而去,你自己好好反省下啦,仲係度諉過於人。任何選舉,「搖擺選民」往往在關鍵時刻定生死,呢點係常識。你出來參與,你個選舉工程的任務就係不斷說服「搖擺選民」成為你的「忠實粉絲」鐵定去投你一票。但你說服唔曬啲選民,仍有一大班選民繼續「搖擺」,你能怪誰?選民「搖擺」,都係一種自由。

仲有,即使冇「雷動」之前,咁多年民主派選民都係咁玩配票架啦,而以前好多候選人都會教選民配票。只不過戴妖出名啲,今次個「雷動」行動多傳媒報導,候選人輸左咪有嘢賴囉。

民主的真諦就係尊重人民的選擇。選民自願參加配票,本身都係一種選擇。配票結果不合你心水,你就話人地配票反民主,輸打贏要,唯我獨尊,咁先至係反民主!

太多名單選擇困難

最後,有啲人話「有得揀先至係老闆」,話「配票」「棄保」變相減少選民的選擇,反民主。如果你真係咁關心選民,你應該知道,當眼前選擇太多時,會令部選民出現選擇困難症,而感到困擾。名單太多,議席有限,選民心裡有數。手掌係肉,手背又係肉,你要啲選民花咁多精神同人開會傾偈、睇民調、動腦筋去諗點投法,你仲好意思話啲選民「配票」。

講到尾,係民主派太多名單,沒有協調,各不相讓,才煩到啲選民。候選人不管當選或落選,除左謝票,更要向選民謝罪!勞煩到選民仲好意思罵人「配票」。