講開熱普城選民共通點,都有好多,好多都有微妙,所以都唔講咁多,講埋呢個。講埋呢個我都會潛水。

之前都話呢班人睇落有少少反社會,好介意虛偽,唔介意衝突。其實仲有一個特點係自始至今都令我好出奇,就係呢班人會睇長文,會睇書,一本本硬硬淨嗰啲書。不論學歷,不論職業,不論年齡,佢哋外表幾爛仔都好,但係好多都估佢唔到,原來係少有會睇書嘅香港人。你可以問下其他候選人嘅票源,有幾多會睇有關佢哋政見嘅書?但係國師、教主、泰博都有為佢哋嘅政見寫書,而佢哋嘅支持者好多都會睇。大亨又寫書又搞網媒,當中有幾多涉及係政治討論?佢哋嘅支持者投入喺思辯政見嘅時間同精神,仲多過電視迷煲韓劇。佢哋嘅閱讀量其實好大好大。有時候佢哋難同人溝通,係真係難咖。

仲有,有好多個page,近幾年極盡諷刺針貶之能事,唔係100毛嗰種玩膠,而係有學識、有見地、硬淨有point嗰種,選舉前紛紛show up,原來都係熱普城選民。呢啲show up,好似不約而同咁。而喺選舉失利之後,又紛紛宣佈以後只談風月,都係不約而同。有人會話佢哋係氣餒,好明顯唔係啦,佢哋幾年嚟做咁多嘢都冇諗過熱普城會參選,而家歸隱,點會係氣餒咁簡單?而係大家feel到,道不行,係時候乘桴浮於海。仲有好多好複雜嘅原因,呢啲嘢,明嘅就明,唔明就算。

一向係兄弟爬山,各自努力;嚟緊要兄弟潛水,各自修行。再睇多啲書,再多啲思辯。可能而家係時候要藏於九地,到有日feel到要動於九天,我估大家自然會不約而同咁show up。

江東子弟多才俊,捲土重來未可知。

多謝各位,有幸見識,有緣再會。再會。