我住港島,上個禮拜我搬咗出去住好耐嘅阿哥番屋企食飯。食飯途中,我同我住九西嘅阿哥討論佢嚟緊立法會應該投俾邊個,佢話都係毓民同游蕙禎之間揀一個。

呢個時候,我老豆突然插入問咗一句﹕「咁你覺得我應該投邊個?」

我呆咗一呆,我老豆喺法律界工作多年,不嬲都係公民黨 fans,我一路都以為佢今次實投硬公民黨陳淑莊架啦。

「你唔係投公民黨咩?」

「公民黨贏硬,又攞唔到兩席,我唔想晒票。」

估唔到我老豆都幾識諗……

我心目中係支持四眼鄭錦滿,但我嗰吓又唔想咁 hard sell…

「咁你心目中有咩人選?」我問佢。

(請注意﹕我媽成程係冇講過野,佢連選民都冇登記到……)

「我都唔知,一係民主黨,一係維基,一係鄭錦滿咯……」

我嗰刻真係有啲驚訝…… 四眼喎,本土派喎,咁激進我老豆都 buy?!

「咁你會投邊個?」我老豆問我。

「嗯,我會投鄭錦滿。」

「佢地都好勤力,成日都見到佢地喺街擺檔。」

「係咯,咁嗰幾個 choice 你自已諗吓。」我話。

「我覺得,泛民都做咗咁多年,俾本土試吓都冇壞啫。」我哥呢個時候加咗一句。

我老豆諗咗陣,冇再講野。

我地全家就繼續食住飯睇《愛.回家之八時入席》。

呢個禮拜,佢每日不停喺度睇寄嚟嘅選舉資料,我都唔知佢研究到啲乜出嚟。有時又會問下我,呢個候選人好唔好,嗰個又好唔好。我都盡量客觀咁答佢啦,始終選舉我都覺得真係自由意志嘅。

尋日,我晏晝喺屋企打緊 LOL,我老豆拍下我膊頭,同我講﹕「好啦,聽日我都投鄭錦滿,7 號呀嘛,我覺得應該要成全你,一齊谷佢,就睇吓啲本土新人有咩做到。」

嗰一刻,好老實講我真係覺得有啲父子同心嘅感覺。我同我老豆不嬲都唔係特別 close,一齊睇波大家都唔會講啲乜,佢捧佢嘅阿仙奴,我捧我嘅紐卡素。不過喺呢一吓,我真係覺得,老豆,I’m proud to be your son。

「聽日晏晝同媽咪一齊飲茶,之後去投票。」

「Orrr…」

寫到呢度,我都真係要瞓喇,因為四個鐘後我就要起身飲茶投票……

不過,最後都要再長長氣氣咁提提大家,唔該唔該,聽日記得投票!

香港島參選名單:鄭錦滿、許智峯、葉劉淑儀、郭偉強、張國鈞、羅冠聰、司馬文、王維基、陳淑莊、沈志超、黃梓謙、劉嘉鴻、何秀蘭、詹培忠、徐子見。

九龍西參選名單:譚國僑、梁美芬、狄志遠、游蕙禎、黃碧雲、劉小麗、蔣麗芸、李泳漢、朱韶洪、毛孟靜、黃毓民、何志光、關新偉、林依麗、吳文遠。