星期日就投票,但出面仲係七國咁亂,所以我用我意見幫大家整合一下。

泛民好鐘意叫大家含淚投票。就算佢地幾衰幾差幾無用都好,為咗對抗建制,政府,都請大家先投佢地先。

第一次用可能有用、立法會仲係泛民建制之爭時可能有用、何俊仁仲未識用iPad睇女果陣可能有用,但而家但凡想香港改變,想建制血債血償嘅人都明白本土先係最有希望。點解大家都對本土寄予厚望?你望下幫佢地含淚含咗十年八年嘅泛民,有冇幫過香港,有冇搞好過香港?連雨革有人想進一步抗爭都急住劃清界線,你仲望佢地會喺而家槍林彈雨下自己出嚟幫你?

含淚投佢,不如幫我含啦,起碼我會回報啲蛋白質比你,仲唔洗十年咁耐。

泛民最大缺點就係Old School,唔識變通。就算口號加入本土兩隻字都好,望下內容一樣係和平理性乜乜乜,到最後都係玩告急玩棄X保Y,到而家都仲係要你含淚。

人地換湯不換藥,泛民連水都唔換,加多粒杞子就算。

泛民講完,咁其它又點計?

香港眾志,由創黨第一日柒到而家:專利唔識拎、錢銀冇蹤跡,捐錢之鋒的。再加上彈出又彈入嘅周庭同男版吳若希嘅黎汶洛,一個由臨呢怪組成嘅團體我搵唔到理由投佢一票。佢地嘅主張同泛民好似,總之都係和平排喺第一。而家嘅香港根本就係個戰場,你想代你打頭陣嘅係一個士兵定The walking dead初期個神父?

劉小麗提果個不設實際嘅全民退保,再配以侮辱女人同男人嘅賀爾蒙論,佢連做人都冇資格,講乜投票?

到最後,以本土做賣點而又最成功嘅,非青政同熱血公民莫屬,而兩者當中我更屬意青政。

好簡單,一個為香港幾近付出一切嘅梁天琦願意相信青政,而且佢地嘅合作比我感覺更似兩班志同道合嘅人互相扶持,依種拍住膊頭上嘅精神先係香港最需要。冇錯,你可以話可能佢地私下有好多協議,一樣互相利用點點點,但到而家佢地未明張目膽咁呃過我,唔似泛民賣港多到我數唔哂。而且我真心信梁天琦,我自然信佢會信嘅人選。衰啲講句,再衰都好難衰過揀泛民。

一張統粹為香港未來嘅白紙,喺而家嘅香港真係好難能可貴。

熱血公民個永續基本法係好,但你要實行就要過立法會,即係要過功能組別,即係要過中共。雖然陳雲話中共會比,因為中國放好多錢喺香港之類,唔會比香港死。但只要你諗下點解條高鐵幾百億冇用要起,三跑千幾億冇用又要起,你就知道中國要用後門運走哂香港啲錢其實好易。你要捉住一個無賴痛腳,其實好難。不過喺冇得揀之下,熱血公民算係同聲同氣。

新東九西投青政,新西九東港島要熱血,要我揀其它人我寧願投廢票。

你問我超區?一個逗號魔人,一個Google王子,睇你又含唔含囉。

 

香港島候選名單:
黃梓謙、劉嘉鴻、葉劉淑儀、何秀蘭、張國鈞、詹培忠、鄭錦滿、羅冠聰、沈志超、王維基、徐子見、.司馬文、許智峯、陳淑莊、郭偉強。

九龍東候選名單︰
柯創盛、黃國健、胡志偉、陳澤滔、胡穗珊、譚香文、譚文豪、謝偉俊、呂永基、譚得志、黃洋達、高達斌

九龍西候選名單︰
譚國僑、梁美芬、狄志遠、游蕙禎、黃碧雲、劉小麗、蔣麗芸、李泳漢、毛孟靜、朱韶洪、黃毓民、何志光、關新偉、林依麗、吳文遠。

新界東候選名單:
林卓廷、容海恩、方國珊、李梓敬、葛珮帆、張超雄、范國威、陳克勤、侯志強、鄧家彪、楊岳橋、梁國雄、陳志全、麥嘉晉、李偲嫣、廖添誠、陳云根、陳玉娥、黃琛喻、鄭家富、梁頌恆。

新界西候選名單︰
陳恒鑌、何君堯、黃俊傑、馮檢基、周永勤、田北辰、黃潤達、梁志祥、朱凱迪、郭家麒、麥美娟、尹兆堅、李卓人、湯詠芝、張慧晶、高志輝、鄭松泰、呂智恆、鄺官穩、黃浩銘。

區議會(第二) 候選名單:
李慧琼、周浩鼎、王國興、涂謹申、鄺俊宇、關永業、梁耀忠、何啟明、陳琬琛