香港人好崇尚利益同現實, 唔重視理念同夢想, 我覺得係香港今日沉淪既原罪之一。大家唔敢去用腦幻想一個你想要既世界,只係想遵守叢林法則,贏開既認為輸既人係抵死,輸既人就認命永遠唔覺得自己能夠或者需要成為上位甚至統治者,最後就會發現自己冇改變社會既動力,甚至連改善生活都唔想,每日三餐溫飽就覺得可以,係屋企安安樂樂禁享受小確幸就可以,世界既事太多太大唔想去理,唔到自己理。

 

但偏偏又會對生活瑣碎事不滿,抱怨,將平日生活同工作既壓力發洩係其他人身上,講住點解茶記食個茶餐都3,40蚊,點解屋村冇哂文具鋪,點解周街都係金鋪其他小鋪死晒,點解火車成日停駛慢駛班次唔準時又逼人,點解周街都有行李喼碌黎碌去同周街都有人係度痾屎,佢地唔想去尋根究柢,佢地唔想去發現呢啲野同一個個社會建設出黎既制度、政策、設定、陰謀等等有任何關係,因為好複雜,因為好難明,因為諗嘢好攰。

 

當好難明好複雜諗嘢好攰,就會冇建設社會念頭,就會覺得其實其他人都會咁諗,其他人都會唔想去改變社會,其他人都係同我一樣依啲野唔關我事…一個個藉口就去俾自己逃避同忽視依個社會發生緊嘅事, 然後同時間就將責任俾左佢地心目中應該負責任既人「官員」身上,「總之佢地會搞掂香港既問題ga la」, 「總之佢地會做好ga la亅,「啲官點做我哋啲平民百姓點會知禁多」。跟住會變成點?咪就係點解有咁多無知嘅百姓仲會去投建制,甚至仲會唔理任何嘅選舉,甚至或者會話全部從政者都係政棍,搞亂秩序,令政府做唔到嘢。但永遠都唔想亦都唔覺得責任就係自己,每一個人身上。

 

係的,依個社會,你都有份,你每一個選擇,每一個行動,每一個表態,每一個支持同反對,都係建設緊呢個社會,塑造緊社會既形狀。記唔記得以前既冰筒籌款?當初咪就係有一個人有個理念,希望其他人感受一下漸凍症病人既處景,就淋起冰筒上黎,然後大家覺得有趣就跟住做,跟住捐錢,最後全世界都一齊做,一齊捐錢。今日漸凍症既研究得以進行就係因為一個人開始做,然後大家都開始做,一齊成就出黎的。

 

唔好再覺得自己冇用,唔好再覺得自己唔可以改變社會,你嘅願景, 你嘅信念, 你心目中嘅世界, 係需要行動去建構出嚟。如果你只係係度抱怨,而唔去做任何野,唔去付出任何嘢,你唔會得到任何好處,而壞處就會處處臨身。因為你唔做野,啲想成就自己貪婪腐敗願望嘅人就會去做一切既野去損人利己,而依一個就係點解你今日仍然會對生活同工作抱怨既根本問題所在,而依一個就係一大群冇自己信念而單單只有現實同利益既人所造出黎既世界。

 

人同動物唔同嘅係,人有想像力,人有夢想,而上天令你有思考、有夢想、而且送對手俾你,就係為左俾你有能力建設一個更好既世界。如果你單單因為小確幸而滿足,不理世界既面容扭曲,最後你都係要承受自己所造成既惡果。

 

我好希望大家唔好覺得政治好煩,選舉好煩,趁選前依一日(編按:今日),留意下新聞,睇下論壇,思考下自己既信念係咩野,思考下自己想生活係一個點樣既香港裡面,用你既意志選一個你心水既人,最後用你實質既行動,表達你嘅意志,建構你嘅願景,唔好再將責任假手於人,然後再委過於人。