所謂配票,到底幾有效?可以睇番2012年既選舉。港島區最高票落敗者同當選尾席之間嘅分別係4,114票,佔總有效投票既1.2%。九龍西當選尾席同最高票落敗者票差係3,914票,佔總有效投票嘅1.7%。九龍東票差係1,938票,佔總有效投票0.7%。新界西票差係985票,佔總有效投票嘅0.2%。新界東票差係4,027票,佔總有效投票0.9%。

分區嘅得票差,都係誤差值之內(港大民調既分區誤差值介乎2.5至3.5%),所以民調結果,往往不能作準。依個係現行選舉制度既死症,同區議席太多,令到最後幾席既得票率相差好細。建制配套就係運用各種策略,幫自己陣營徘徊當選邊沿既候選人攞多幾千票,繼而搶下最尾一兩席。

反制之策,實在只有拉票。新西一千票,只要有二百人,每人動員5票,己經超過末席嘅票差,打敗左建制嘅配票。要知道,建派既配票係由高民望既候選人配俾低民望既候選人,故此有個極限:太多配票,就會損害到高民望候選人既選情,反而得不償失。所以配套亦有極限,只要我方動員較多票,一樣勝利有望。

選戰到左而家嘅階段,已經越過左宣揚理念或介紹候選人既階段。現階段既關鍵係動員投票。一方面,係保證原本有意投票既選民唔好甩票,但更重要係開拓新票源。每屆立法會投票率,只有45%到53%,意思係有約一半人係唔投票。所謂新票源,主要就係依類人同埋首投族。與其互界選票,不如鼓勵身邊未投過票既選民出來投票。食飯、電話、whatsapp都得,只要佢出黎投票,投俾廣義既同路人,都算成果。

具體說辭,可以分好幾套。有動之以情:「唔該幫幫手,我係XXX既義工/朋友。」有動之以義:「你唔投就害左你個仔。」有訴諸理想:「獨立/真普選係遙遠,但係行左依一步先啦。」有破除神人論:「政治唔會有聖人。但係你唔投俾個50分既契弟,689就連任。」網上亦有好多拉票策略,可供各位參考。美國公司既營銷部門,經常會請做過選舉義工團係畢業生,就係因為義工團係口才既最佳訓練場。

借用神驅益友論:友Like 友Comment 友Share。選舉工程同玩FB一樣,都係群眾遊戲。建制有佢既方法,我哋都一樣有自己既方法。回想14年雨革失敗後,幾多人都覺得敵方會急速掃盪,完成直正所謂既「人心回歸」?但係我地憑著少數人既幹勁,總算抗衡至今。今次對方空群而出,全力出擊,我哋只能夠沉著應戰。近兩年既「拆大台」、FB/兩登論政、甚至好幾起行動,都係靠群眾一環扣一環先發生。外國學界早有論及鏈狀社會,當每一個人都發揮自己既能力,做好鐵鏈嘅一環,成條鐵鏈得以成型,戰力就非同少可。

因為重要,所以寫多一次:只要一人動員五票新票源,或者就可以打亂建制派部署,大局隨時為之改寫!仲有幾日,大家共勉之。天佑香港!