「熱普城參選唔係為咗參政,因為佢地會總辭發動制憲公投」

自從熱普城宣布參選之後,坊間一直流傳此說,亦都係好多選民嘅期望,認為幾位參選人唔係為議會嘅資源(成十皮野個月啫)或者權力,因為佢地會辭職。咁同時係坊間亦提出疑問,到底幾時會辭?如果唔係五區都有議席咁仲會唔會辭?唔夠五區都辭會唔會唔夠公信力?

一直有好多市民都對熱普城嘅辭職好關心,幸得國師陳雲係選舉前「五」日出嚟澄清

係度亦感謝本土新聞報導:

<陳雲:今次選舉已是「五區公投」 辭職公投風險大是「備用方案」 >

//今次立法會選舉已經是「五區公投」,因為這與熱普城候選人當選後辭再提出政綱進行表決的情況是一樣的。//

//他說,五區辭職公投是最後的談判,已是將所有風險減至最低,並將成功推到最高,是「最安全的冒險」//

原來係咁嘅,9月4日已經係公投制憲架喇,唔洗等辭職架,之後係咪會辭職都唔一定架,咁樣當初諗住幾位參選人會辭職嘅就要重新調整吓啲期望喇。係度真係要多謝陳國師嘅光明磊落,係選舉之前幾日對總辭作出澄清,如果唔係俾人誤會熱普城用不良銷售手法誤導選民就唔好喇。

不過咁,聽咗國師嘅澄清,筆者就有啲問題走咗出嚟喇,黃洋達雨革之後話唔選,如果佢會辭職都講得過去呀,雖然係18年先辭,都叫辭呀,係度提一提,坊間有人以為係即辭,唔係架,買野要睇清楚條款,唔係俾人話你自己唔睇清楚,係你自己on9就唔好喇。

話說回來,依家國師咁講法,如果唔辭,咁咪變咗話唔選又選囉?黃毓民唔係話要有政治倫理咩?等等先,我記得當日雨革有熱血公民成員衝擊立法會(利申:筆者對衝擊行為並無異議),岑敖輝曾經講過要講運動倫理,嘩,當時我諗,你個倫理有啲咩架?你唔早講,其他參與者有無同意先?

仲有係鄭松泰係節目講過:
「喂,你急咩唧?我哋五個入咗去真係入到,兩年之後補選,咪係你哋嘅世界囉」

咁依家唔一定辭喎,算點呢?

老實講,無陳雲嘅城邦論,無熱普城嘅大力宣傳,筆者敢斷言香港嘅本土思潮係唔會得以發展,同時筆者亦希望大家留意梁天琦係港獨集會嘅一段發言:

「香港人要學懂堅持信念而唔係拜神,唔可以因為一個人腐化而覺得信念都係假嘅」

參考資料:

陳雲:嚴正宣布,本人及城邦派正式與《本土新聞》割裂

《本土新聞》:回應陳雲在選舉廣告上對本報的失實指控