1939年8月,响歐洲出現咗一場「外交革命」:被視為世仇宿敵嘅兩個歐洲最大獨裁國家—德國同蘇聯,破天荒簽下互不侵犯條約,震驚當年全球唔知幾多億人,西方各國左翼更是心碎得遍地玻璃;但其實當中嘅故事對眼下一啲青年參政者頗有警世意味,政治世界波譎雲詭,隨時今日4人合照、聽日就4人混戰(嗱,我講緊竹戰咋吓)。

「我唔知呢係咩嘢政治倫理」

講起呢場兩大魔君(希特拉、史達林)之間嘅交易之所以震驚全球,原因不但在於德蘇條約顛倒咗整個歐洲嘅力量平衡(此約令蘇聯倒向德國,德國同英法交戰時無東顧之憂),更不難想像當時西方評論家驚呼:呢係咩嘢政治倫理?納粹德國希特拉由寫作《我的奮鬥》到坐正「元首」之位都「勿忘初衷」:反共(產主義)=反猶(太人),斯拉夫人係劣等民族,所以必須滅絕蘇聯、以蘇聯領土拓展德意志民族「生存空間」;而蘇聯係當時世上唯一斯拉夫大國及唯一共產主義國家,史達林亦明知納粹威脅蘇聯生存,所以先任命李維洛夫任外交部長、推動同西方合作「集體安全」、制衡德國;但一場「慕尼黑陰謀」又勾起俄共對西方嘅不信任感,認為西方想將德國禍水東引,聽任蘇聯獨力抗德;出於自保需要(德國已同日本結盟,自東西兩方威脅蘇聯)及利益考慮(附有德蘇瓜分東歐密約),史達林改任莫洛托夫為外交部長,同德國外長里賓特洛甫於1939年8月23日正午簽訂德蘇互不侵犯條約 ;9月1日,德軍東侵波蘭。

因利害義、為私利侵略無力無害於己嘅鄰國

德軍入侵波蘭後,蘇聯紅軍亦由東面西侵波蘭;9月17日兩軍會師布列斯特;9月25日德蘇兩軍舉行聯合閱兵式,標誌兩國對波蘭的瓜分佔領。11月30日,蘇軍入侵芬蘭,迫使芬蘭割讓領土;1940年6月蘇聯逼使羅馬尼亞割讓比薩拉比亞及北布科維納,並吞併立陶宛、愛莎尼亞、拉脫維亞三國。其餘東歐各國包括匈牙利、保加利亞都倒向德國,芬蘭同羅馬尼亞基於外交上對蘇聯反彈,亦加入德國陣營。而蘇聯因利害義,為咗實現瓜分東歐,不惜背叛自己原先「集體安全」諗法侵略周邊弱小國家,並以為瓜分所得到嘅新領土可以形成防範德國嘅保護層,甚至出於「政治倫理」繼續依約聽任德國侵略歐洲、仲將高加索產油區石油源源不絕供應德軍使用。

自食苦果,半壁江山盡陷敵手

獲得蘇聯石油支持嘅德軍橫掃北歐、西歐,而最出蘇聯意料係:德軍閃電戰迅速真.KO法國;稍後,倒向德國嘅芬蘭、羅馬尼亞都迎來咗德軍;原先以為德軍同英法响西線作戰必曠日持久,蘇聯紅軍將成為主宰歐陸嘅最終霸主,結果反而係:史達林對英國有關德軍增建响波蘭佔領區鐵路嘅情報愛理不理、hea 備戰、繼續運油比德軍戰機坦克使用,到1941年德蘇結盟失敗,德軍於是年6月22日聯同芬蘭、匈牙利、意大利、羅馬尼亞執行「巴巴羅薩」行動;一年間,蘇聯歐洲領土部份有一半(包括莫斯科市郊)淪入敵手,喪失7成工業能力,軍民死傷已成天文數字。當然最後蘇軍仍於長期戰中力壓德國,此為後話;而根據西方統計數字,整個德蘇戰爭中,蘇聯總共死亡2660萬餘人,一共5980萬人傷亡,而呢係後來蘇聯任何勝利都補償唔倒嘅損失。

蘇聯經驗對香港部份青年參政者嘅啟示

德國同蘇聯簽約並非真心同蘇聯合作,純粹利用蘇聯嚟促成自己攻擊波蘭同英法而已,遲早都係會侵略蘇聯;同樣,一個媒體忽然拉攏一班自己曾經恐嚇過要滅絕對方嘅青年參政者政治團體,其實亦只係志在利用青年參政者入世未深、作為自己打擊政敵、滿足自己私怨或其他可能嘅政治任務嘅工具而已,青年參政者本身嘅政途並非該媒體所關心;青年參政者應充實自身實力(做好論述、完善自身組織架構)、慎思各方方利害關係以免受人唆擺利用而不自知,否則即使成為另一個蘇聯,雖勝而得不償失,何必呢?