最近一波反港獨,劍指中學。不過學年未開,「本土關注組」就愈開愈多,反關注組反而變成宣傳。依個現象並非偶然。官僚機構面對危機毫無行動,好容易被上級批評唔做嘢,反而就算明知行動會愈幫愈忙,只要有所行動都可以向上級交代。所以官僚系統極容易出現過度反應,令情況更惡劣。台灣抗爭時代既「暴力邊沿論」,不停挑戰政權底線,誘使政權做出錯誤反應,官僚機構既「自保行動」就係其中一環。

 

不過今次反關注組,官僚系統冇著力點,只能夠禁止講「嗰四隻字」,彷彿四字真言係密宗咒語,只要少數學生反覆吟唱,其他學生就會拜倒旗下,成為失去思想既傀儡。事實上,中學生反叛期係成長過程嘅一部份,建制權威愈用強權禁止,中學生必然會更有興趣瞭解。一有興趣,自然會自發搵料,自發思考,繼而形成自己嘅固有思想。所以引導其他人批判思考之後,衝唔衝擊條紅線,其實無關宏旨。
我個人絕對反對港獨,更加反對向中學生播獨!不過有幾個歷史事件,都曾經令中學時代既我長久思考。希望各位亦能夠瞭解一下。

 

一:新加坡被逐出馬來西亞聯邦。係英治時代,新加坡、檳城、同麻六甲三個城巿組成海峽殖民地,同馬來半島其餘殖民地係分屬兩個政府。脫英之後,新加坡曾經有兩年(1963至1965年)係馬來西亞聯邦既一部份。雖然當時新加坡係馬來西亞最重要係金融貿易中心,但係馬來西亞最後都將新加坡逐出馬來西亞聯邦。注意事件既重點唔係新加坡獨立,而係新加坡被逐。新加坡做左咩嘢,先令情況惡化,令到馬來西亞覺得新加坡繼續留馬係負資產?

 

二:蘇聯加盟共和國。蘇聯體制上係十五個加盟共和國既聯盟,除左二戰之後加盟既三個波羅的海共和國之外,大致上繼承左帝俄時代既領土。係西方政治傳統,民族國家由民族組成。帝國就係因為歷史因素,統治超過一個民族。幾個民族分居各處而又未能融合。幾個歷史大帝國,包括神聖羅馬帝國(奧匈帝國)、鄂固曼帝國、甚至沙俄帝國,係現代化之後都要處理同境內少數民族既關係。一旦地緣政治變動,例如一戰之後既奧匈帝國同鄂固曼帝國,或者1991年既蘇聯解體,結果都選擇放棄非核心領土。點解會咁?練乙錚幾次論及既「優質版圖論」,就係討論依個問題。

 

三:點解鄭和冇發現新大陸。美國學者戴蒙既成名作《槍炮、病菌、與鋼鐵》提出過一個問題:點解發現新大陸既係哥倫布而唔係鄭和?需知道鄭和下西洋既時候,明帝國既船艦技術係全球第一,所以鄭和可以去到非洲東岸,技術上就可以去到美洲。但係點解後來明朝會先去先機,最後到清朝中葉積貧積弱,變成東亞病夫?有興趣既朋友可以係戴蒙既書裏面搵答案。

 

四:毛澤東曾倡議湖南共和國。最近唔少評論家同論壇都抽依件事既水,細節我唔覆述。但係當日除左毛澤東之外,廣東軍閥陳烱明都有提倡聯省自治。如果中華民族係自古以來存在,點解當日既頭面人物,都會鼓吹分裂思想?單為個人或黨派權力,並唔係完整答案。因為如果毫無理論基礎,政治人物都會另選其他理論。會成為政治綱領就證明,理論有一定既支持。我地現有既中華民族,理論基礎來自咩野?