相信睇緊依篇文嘅你,都係支持民主且對港共政權不滿,希望今次能選出個代議士改變香港,改善政府施政。而今屆候選人中所謂反建制嘅 力量又分為兩派,1。泛民主派 2。本土派,我希望透過下文試解釋為何2更加值得支持。 於我而言,相比之下,最值得支持本土派個位並不在於什麽港人優先 – 而係本土派果種甘於改革,願意跳出傳統反對派框架,真正為我地香港人嘅未來主權憲制提供想象或實行路向嘅心。

 
係正式討論之前,我想先展視一個立場,我見近年來許多本土泛民支持者會互相指責對方係鬼,係「民建聯b隊」或者乜「維穩民主戲組合」, 「介票組合」。本文不想卷入此等無結論等謾罵,所以下文會主要跟據參選人參選政崗及某些客觀事實作出評論,並不會人身攻擊或猜疑部分候選人。

 
首先講一個現實,梁振英任內,中港共惡行真係數之不盡,罄竹難書。李波事件,暗角七警,廉署大動盪,年初一事件…… 而關於經濟方面,新界東北發展,爛尾高鐵追加撥款,機場三跑……又係數都可以數一頁。如果以上嘅野都令你憤怒的話,我不妨請你諗吓,咁係你心目中理想中嘅 香港係點? 689落台?(但你難保將來個特首唔會更加無恥);實行真正雙普選?(但雨傘革命或者你哋叫雨傘運動/佔中嘅失敗已經證明中共係唔會讓步 — 或者至少證明我地再用過往嘅抗爭手法同主張,係唔會令中共動搖)。咁接住落嚟,我哋(或者政治團體)應該點做?繼續爭取同中央通話?(但傾左咁多年 特首就越來越賤格); 等有不義法案睇下可唔可以投反對票或者拉布整走佢?的確有成功例子,例如網絡23條,醫委會改革,部份大白象工程,但你睇埋上面例子,你就好明顯知道成效係有限。

 
又或者嚟個極度烏托邦嘅幻想,假如政府肯妥協而落實大家關注嘅大部份議題:例如設立最高/標準工時,收回單程證審判權,為李波討回公道…… 但就死都唔肯放過某幾樣嘢,let‘s say 機場三跑。我覺得你都唔應該會滿意,因為依啲與民為敵,違背港人利益嘅施政跟本一開初就不應該存在。而同樣地,喺一個正常嘅世界入面,李波係唔應任何一刻該比人捉去做坐頭艇;亦都唔應該有人返工翻到暴斃;香港人早就應該有權審視邊個有權入籍;香港入口嘅奶粉本身就應該serve香港人先(甚至係only)
好啦,睇到呢度,請你跳出假想一下,返嚟現實,我相信你都發現到於現有環境之下,1.政府愛倒行逆施 2.好多時反對派對所爭取嘅,例如:標準/最高工時,交代銅鑼灣書店事件等 , 或是政府推出所謂「好」嘅政策,例如限奶令,增建公屋等都係基於一啲本身就應該存在嘅原則,事物或者價值。我哋係咪要應該諗吓:應否無了期地向當權者(所謂現有大制度下)提出一項項亡羊補牢嘅請求? 處於一個被動狀態,睇到有不足啦,就要求政府錯一樣就補一次鑊。除了依啲嘢以外,會唔會可以做到更多,例如似本土派咁樣提出其他主張,由下而上咁嘗試推翻或改變現有政府大台,權力架構,而令到我哋未來嘅新政權係一開始施政時就學識「自動波」 推出一啲合情理嘅政策,而非處處與民為敵。

 

首推熱普城團隊理念,陳雲及其團隊提出咗個既創新又大膽嘅概念 — 全民制憲,永續基本法。只選重點來講,陳雲認為基本法經過中英於8,90年代(尤以六四事件後)不斷談判,例如:加以香港要有獨立司法仲裁權,中央不得干預特區政府內政等,基本上已賦予香港足夠主權建立自我的政體。此時你又會猶疑:「嘅然講到咁巴閉,點解呢刻中共又會指使梁振英政府去敗壞我地香港?」先不論中共派係內鬥,其中一個原因就係中共害怕2047大限後嘅不確定性,所以要不斷赤化香港 (每日派150個單程證以溝淡本地人人口; 推行國民教育以求令我哋下一代不再對中共恐懼或存有叛變之心; 使香港人錢去興建高鐵以疏通財閥及方便未來派兵到港,務求要收返香港時收得順順利利。故此,永續基本法可以確立香港前途實權問題,減低中共戒心,甚至更曠闊我哋現有嘅圈限。用普選作例,中共到時可以允許我地香港人挑選自己嘅行政長官,因為佢地唔需要再擔心2047時要收返一個已經民主化左嘅香港,中共可以繼續大安旨意對其境內城市行獨裁政策。 加上全民制憲將基本法某些不完善或不合理條文修改,例如23條等以保障香港言論自由,而最吸引人嘅位係,陳老師亦相信呢套理論會為中共所接納,因為於中共而言,香港是為中國接駁國際市場嘅橋樑,於近年內永續基本法能夠穩定本港金融市場長久發展(例子如:穩定銀行業務中嘅長期投資及房貸等),最終能惠予中共(其效用於中國經濟爆破後尤其顯住)。

 
而泛民主派部份議員(例如公民黨陳淑莊),亦於最近關注起相關尤以未來房屋土地權限議題;民主黨黃碧雲於文宣上同樣認為需要永續真正自治一國兩制,當中與陳雲老師格局不謀而合。(備注:公民黨於決定港人未來中有其立場及主張,不過於下文會再作討論),當中比較值得一提的是人民力量社民連選舉聯盟,於人民力量網站中,人力提到要修改部份基本法(例如行政長官選舉或人大釋法制度等),然後再由港人重新制憲。先不論整體格局可行性,我執著位在於「港人重新制憲」(此處所指港人是普羅大眾或是你人力核心成員?);如果是前者的話,熱血公民早於2012年未已經推出網上全民制憲系統並將相關結果反映在是次政綱之中。假如是後者的話,為何人力不於今次選舉中交代清楚整體佢地心目中的「香港憲法」,又或者最少交代清楚佢地立約時間路線圖。於比較之下,先不說其他泛民政黨抄襲與否,但明顯見到呢刻熱普城整體思路怖局都較為嚴謹完整,準備亦夠充足。

 
接住落來筆者打算推薦本土派系中 Allin HK聯盟(由青年新政,東九龍社區關注組及其他地區本土組織)合成,與熱普城不同,佢地嘅政治主張係「香港民族 前途自決」,該聯盟打算於2021年舉行讓港人進行對未來政權或政制嘅公投,並以港獨作為其中一個必然選項,希望給予壓力和指標2022年度的行政長官。與此同時,香港眾志列陣聯盟(侯選人包括劉小麗、羅冠聰、朱凱迪)則以類似方式並提出於10年內要港人「民主自決」而且港獨亦是一個選擇。兩個聯盟所謂自決背後嘅精神 – 就是要體驗民主及歸還選擇權比香港人。但分別是Allin HK強調香港民族意識,Allin HK是以港大《學苑》 香港民族論作為基礎, 認為香港人必需有自我身份認同,當中包括但不限於:認同歷史傳承下來嘅文化(如三權分立及使用正體字等)及 願意以香港人權益為依歸,比如市區商場同大學學位同資源嘅使用權和享有權等。當香港民族身份確立後,港人便能擁有主體意識決定香港政體嘅未來。

 

你依刻可能會問「整個咁嘅投票,我做民意調查唔好? 投到出來係一國一制咪大件事?」 冇錯,依兩件事的確有可能發生,但首先我地要搞清楚,Allin HK聯盟並不是政治中立的,反之立場是比較進步。九東候選人陳澤滔表明個人立場支持港獨;新東侯選人梁頌恆被(支持港獨的)梁天琦臨危托孤出選,並策略性地有「99%相同主張」。可能你會反對港獨而且認為港獨不可行,我想係依度指出,未來具有不確定性, 而我哋今日嘅想象,目標以及行動係會有份塑造到我哋未來。 我不得不承認現時獨派理論的確不夠完善成熟,但最近選管會、 教統局以及梁振英的言行已顯示出港共政權扼殺「港人(講)港獨」之執著。我哋需要一個對於未來政制立場更激進及鮮明嘅代議士入去議會,用佢哋嘅資源(包括但不限於:議員經費,知名度及主流媒體嘅曝光率等)及權力(議證空間,修訂權)去一步步將「自決/港獨/民主」等理念宣揚開去 。真係去到2021年投票時,決定香港前途嘅責任不單止落喺某幾個議員身上,而係在於依5年間,佢哋肯花幾多時間心力去宣揚,我哋又肯花幾多時間去了解思考同埋同向身邊嘅人宣揚我地嘅理念,又會否有更多關於自決選擇嘅理論推出,上述嘅一切一切都會影響到個投票結果。

 

星星之火,可以燎原。試問當初你又有否想過香港有前後數十萬人,去參與到一場79日嘅佔領行動?你又可否想到今時今日中學入面會有學生成立本土關注組?再唔係退一萬步睇, 就算港獨最終唔能夠成事,港獨思潮同理論嘅崛起對香港整個嘅非建制嘅政治光譜都並非壞事,港獨係香港政制光譜上最極端嘅位置,與港獨相較,永續基本法或者更換特首就顯得非常溫和。當一個極端主張在社會有一定民意時,到時中共港共就必定要正視呢個社會矛盾,結果可能係願意作出部份妥協,亦都有可能更加強硬。但此刻我知道的是,一個比一個差嘅特首;一年比一年多嘅基建支出;一次比一次過份嘅政治打壓,香港人再沒有被溫水煮蛙嘅空間。

 

關於「自決」議題上,公民黨及工黨均有提出推動公投法–希望政府能於重大政策議題上還政於民,讓市民能夠投票選出自己心水議案。而公民黨亦有特別提出希望將公投法運用於決定香港未來議題上,並於九月後發行「港是會議」,邀請對前途抱有不同立場嘅派系溝通對話。不妨就當公投法能夠改變權力使用架構,但此動議問題如下: 1.中/港共政權為何會放水比香港人?(相比永續基本法,中共利益是有計算在內)2. 就單純就自決理念而言,我認為自決之路向首要能改變整個政制價構,次重要性就是拉闊非建制派之政治光譜(Allin HK聯盟嘅賣點)。

 

睇到依度,你可能未必同意我嘅觀點,但我好希望你能夠花少許時間去了解一下本土派及其主張,以及其觀念對今日香港嘅重要性同啟示性。同時亦請你想象一下,泛民主派有啲乜獨特性係你認為非支持不可?本土派政崗相比又有何不足?最後想提出多一樣野,熱普城黃毓民發言議政質素之高就連建制曾鈺成都贊好;游蕙禎亦都於無線選舉論壇中承絡願意用盡一切手段為香港人推倒港共惡法。一派是充滿有理論經驗大局觀之學者政治家,一派則是充滿熱誠並願意為香港犧牲嘅年輕人,請你於九月四日,利用你手中一票為香港帶來變革和希望,支持本土派。

 

 

香港島候選名單:
黃梓謙、劉嘉鴻、葉劉淑儀、何秀蘭、張國鈞、詹培忠、鄭錦滿、羅冠聰、沈志超、王維基、徐子見、.司馬文、許智峯、陳淑莊、郭偉強。

九龍東候選名單︰
柯創盛、黃國健、胡志偉、陳澤滔、胡穗珊、譚香文、譚文豪、謝偉俊、呂永基、譚得志、黃洋達、高達斌

九龍西候選名單︰
譚國僑、梁美芬、狄志遠、游蕙禎、黃碧雲、劉小麗、蔣麗芸、李泳漢、毛孟靜、朱韶洪、黃毓民、何志光、關新偉、林依麗、吳文遠。

新界東候選名單:
林卓廷、容海恩、方國珊、李梓敬、葛珮帆、張超雄、范國威、陳克勤、侯志強、鄧家彪、楊岳橋、梁國雄、陳志全、麥嘉晉、李偲嫣、廖添誠、陳云根、陳玉娥、黃琛喻、鄭家富、梁頌恆。

新界西候選名單︰
陳恒鑌、何君堯、黃俊傑、馮檢基、周永勤、田北辰、黃潤達、梁志祥、朱凱迪、郭家麒、麥美娟、尹兆堅、李卓人、湯詠芝、張慧晶、高志輝、鄭松泰、呂智恆、鄺官穩、黃浩銘。