電影「V煞」曾有一言,十分適合依個時局。「Beneath this mask there is an idea, Mr. Creedy, and ideas are bulletproof.」— 理念係刀槍不入。

港獨思潮徐徐升起。香港人由本來既大中華膠,慢慢變成港獨支持者。從數據可以得知,香港市民對「中國人」依個身分嘅認同,由2008年嘅39%,下跌至2016年嘅18%;單論對「香港人」依個身分嘅認同,更係由2008年既22%升至2016年既42%。除此之外,香港係有17%既市民係支持港獨,係15至24歲當中,更有四成人支持港獨。再者,根據港大《學苑》調查指出,有近六成港大學生支持香港獨立,另外亦有三成受訪港大學生支持武裝革命追求港獨。由此可見,港獨思潮已經深深紥根於年輕一代。

俗話有云:「越撳越出屎」。而無論中共同梁振英政府如何打壓港獨思潮,港獨已經慢慢植根於香港人既內心之中。由梁振英上台開始,香港人開始覺醒,了解到中共既可怕之處。中共公然違反基本法,政治篩選參選人,剝削香港人嘅參選權與被選權,以言論恐嚇教職員,對學生進行思想禁制。種種惡行卑鄙無恥,醜惡至極。但係,任憑中共及其支持者如何出盡洪荒之力表示有過一絲港獨念頭已屬違法,言論自由並不包括討論港獨,都係無法阻止香港人繼續支持、討論以至推動香港獨立。

除咗「越撳越出屎」外,仲有句俗語叫:「捉蟲入屎眼」。梁天琦、陳浩天等人喪失立法會參選資格,令到有近3000人參與係添馬公園既集會;近期梁天琦被襲擊一事,更令獨派義士曝光率急增。頓時之間,「港獨」一詞不絕於耳,互聯網上更隨處可見有關港獨既言論。另外,先有中學生發起聯署支持港獨,遞交到各國駐港領事館;後有來自不同中學既學生成立本土關注組,搞講座分析港獨利弊。本土同港獨既光譜漸漸擴大,就算他日港共政權真係立法禁止市民談及「香港獨立」,最多只會好似電影「十年」其中一節「本地蛋」般,變成地下活動。港共根本無可能徹底清除港獨思潮,只會因為香港失去言論自由,令到更多香港市民走出來支持香港獨立。