香港人俾人印象係醒目、快手腳、串咀、走精面、世界仔、識中英文、好國際。依D印象太表面,我甚至覺得係負面。今時今日嘅香港人係尤如聖人一樣容忍力高強、包容度高、適應力驚人、靈活變通,仲嚴己寛人,真係能人所不能!

梁特首自2012年上任,無論係佢定係佢嘅「班子」都犯上太多嘅錯誤。佢本人以 UGL 案最為嚴重。嚴重到 ICAC 人員被燉冬菇。佢當然仲有潛建事件,其千金被家暴而警方不可受理事件,另一千金及其妻漠視機場保安事件。任何一單,係香港未國歸祖国懷抱之前,都係要馬上落台。佢嘅「班子」以劏房波(又名囤地波、醉駕波、誹謗波等)為首,多次犯下係正常國家會受法律制裁嘅事,偏偏又穩如泰山咁攞高薪厚祿,快樂過活。無他,就係各位香港人容忍力高。我估大家服務嘅公司有任何人犯錯,大家都會如 Paul McCartney 咁唱 Let it be (成首歌係得呢句歌詞)。後生D咪唱 Let it go (都係得呢 一句歌詞)。一個團體嘅高層崩壞唔緊要,重要嘅係大家俾機會佢,寛恕佢,就算令個團體潰散都無所謂。香港? let it die!

香港人能屈能伸,適應能力驚人。居住地方越縮越細,瞓棺財房都冇問題。再唔係就住到冇雷公咁遠,搭長途車返工返學。不過時間就會長再好多。局長話等多幾班車,包容旅客。就算巴士上充滿行李箱, MTR 內有對洗衣乾衣機,大家都繼續等多幾班車,由得佢。正所謂:「可以點喎!」禪修嘅另一境界。

不過以適應度講,最強勁莫過於適應鉛水啦。全港多個地方都驗出食水有鉛,而鉛係可以沖涼時由皮膚吸收。大家都可以求其啦,冇所謂啦,咁生活落去。可知道,中鉛毒,可以令人有高血壓同對腎臟有損害,腎喎!對小朋友腦部發展更有嚴重損害。有D不知好歹嘅港燦要D話鉛水冇害嘅官員飲鉛水,林鄭話咁係令官員受辱。唔通好似美國總統咁當眾飮杯水以解民怨?反正嘈嘅只係小數人,大家飲飲吓咪慣囉!人生苦短,慣咗就一世。連鉛水都適應到,咁香港人全面講普通話,寫殘體字,指日可待。正體字?母語?香港話?華夏文化? Who 北京 care?

頭先提過下交通工具。大家明知帶上車嘅行李、大型家具、電器,以及一箱箱嘅貨係走私賊,大家都忍,又 let it be。相反,當一個香港人做少少嘢唔啱大家心水,就拍片公審。香港人就如此神聖,對自己人苛刻,對其他人就血濃於水,處處遷就。北方小朋友比香港小朋友可憐。床位、奶粉、疫苗、醫生、學位俾北方小朋友。香港小朋友冇,係無問題。香港政府 cut 醫療開支,病人冇少,醫護人員都狂踩不合理工作時間,以人及專業為先。但政府以唔夠人為由,話要開放俾其他國家醫專嚟香港執業(因為大家都係中文人,當然以北方強醫為主要先)。更話要降低考試難度。大家唔覺得係一回事。 大家覺得 香港醫療體制醫醫相衛,一定要停止。係此情況之下,就算綑綁接受標準低嘅醫護人員亦無所謂。今時今日已經對香港本身水準嘅醫護人員滿有怨言。點解唔能夠預視呢班將來引入嘅醫護嘅能力同醫德會係更加差?

2014年,一班不知好歹嘅港燦佔領咗香港七十幾日,毀壞法紀,破壞香港穩定。呢班不知好歹嘅港燦與鼠蟲為伴路宿街頭。以要真普選,要民主為名,去迫警察用胡椒噴槍顏射佢哋。佢哋武力升級,以眼罩、雨衣、雨傘去防衛。警察只好聯同有勢力人士用警棍亂打呢班人。七十幾日裡面各有各升級。呢班人竟然用上兒童地膠板同工業用頭盔去防衛。警察亦戴上有鍋釘嘅手套去對付呢班唔敢攻擊佢哋嘅人。香港人憐憫執法不公,濫用警權同有支槍嘅警察。而唔係手無吋鐵,嘗試停止香港倒退嘅呢班人。當然,香港人係嚴己寛人,此乃君子嘅表表者。(切記,此「己」並唔係該人本身。)

香港人犀利,可以將自己本來擁有嘅繁榮、文明、法治、安全、民主、自由供手相讓。或者過去十幾年係繁華,有一地嘅旅客、金鋪、化妝品鋪、藥房。但當中令幾多行業失去生存空間?因為呢D旅客同新移民(註:由北方移民嚟香港嘅人,香港係無審批權。係任由北方政府每日放 150 人來港。當中包括係香港謀殺及縱火罪名成立嘅施君龍。一日百五,一年大概五萬四千 ,十年就五十四萬人,出年係香港回歸二十週年)香港文明、整潔、法治度急速下降,往日香港偶爾有醉酒佬係後巷小便。警察見到會話佢,甚至拉返警局。依家,係街頭、廣場商店門口、商店內、餐廳食桌上、醫院門口都不乏大大小小嘅北方強人係度 show qualy 解放大小二便。警察唔會執法。大家去話佢哋,警察更加會保護佢哋。高 官 更加叫大家包容。香港人咪聽聽話話咁包容囉。

一個正常嘅地方,只有當地執法單位可以去捉拿當地人。香港雖屬中国,但基於一國兩制,五十年不變嘅原則之下。香港人係無理由係香港之內冇犯香港法,而別的地方覺得有問題嘅情況之下被別的地方捉拿。呀!唔係,係被擄拐。因為係無經港府將人擄走。如果咁係 ok,咁不久之後,就有其他極端國家因為香港人食豬肉而嚟捉香港人去斬頭。大家禁食豬肉啦!(有好多國家、文化對更多食品有禁,小心D!)

香港民主派廿幾三十年嚟,為香港爭取民主,努力不懈。大家感覺到香港有冇多咗民主?我就覺得少咗。以近日熱話「數名參選人被褫奪立法會參選權」為例。往日選舉主任嘅批認基礎係睇參選人有否填齊表,簽唒名,係咪附合參選資格:年齡、國藉、提名前三年是否通常居港等。如果參選人係有別國國藉,唔放棄,而唔被批準參選係正路。但係,參選人嘅政治立場、主張、言論係乜,唔到選舉主任去評核,亦唔到佢哋去加上主觀諗法。但佢哋就基於個人認為,去判定幾位已有足夠(而有多)提名人嘅參選人嘅被選權。同時,亦剝奪全香港選民嘅選舉權。佢哋拎走咗本來合格嘅民選立法會議員資格,令香港人失去民主,自由度大幅倒退。大家係網上一言一句去表達心中苦惱,都足以以言入罪,上你門,拍你門,捉你走。雖然民主自由嚴重倒退,香港人依然忠心於失敗嘅民主派,唔俾新派上位。香港人有情有義,忠心護民主派。

香港人就係如斯豁達,神聖。政府打壓、鉗制、剝奪大家嘅自由、民主、安全、法治、文明、繁榮。香港人依然如聖人般去包容、適應。就連將香港完全換血,令香港人衣食住行都貴、辛苦、擠擁。令香港下一代更加活不下去。香港人依然能人所不能!

Let it go
Let it be
Let it die