一覺訓醒,就見到成個Facebook都關注緊梁天琦被大公報記者打件事。我相信好多人同我一樣好憤怒,不過除左怒氣之外,我有留意唔同KOL對呢件事嘅分析,希望綜合各人之見,加埋我少少諗法,評論下我地應該點做。

一、唔好再矯情

雖然心入面好憤怒,但係大家無需要係社交平台到不斷話「梁天琦好慘」、「點解要一個後生仔承受咁多」之類嘅說話。

矯情係左膠所為,亦都係過去十幾年社運不得民心嘅原因。梁天琦係本土派之中嘅強者,大家唔需要將佢塑造為弱者,因為到最後人係支持強者個邊(特別係所謂中間派)。

如果大家想幫梁天琦,大可以做好多其他野,例如「探討」下個大公記者嘅來歷;好似梁天琦所講,認住佢地,再跟返佢地;亦有高登巴打考慮整一個App可以畀重要人物。而簡單嘅網上討論,大可以集中係件事身上,例如壹傳媒自稱片段係由讀者提供嘅可信性,有無可能係壹傳媒自己都有派人跟蹤梁天琦;或者如果你遇到同類情況,要保護已經有案底唔可以打交嘅朋友,可以點做,即係我以下想講嘅野。

二、有效阻止朋友捲入毆打嘅方法

如果敵人對你朋友挑釁,雙方有機會打起上黎,多個鏡頭影住你地,而你真係唔想自己朋友捲入毆打,最進取嘅方法,係你繞去敵人後面,一面勸敵人要保持冷靜,一面阻住敵人前進,當然前提係要對方得人少,同埋環境許可之下,仲要你有膽有力。如果環境唔許可,你都要企係敵人同自己人中間,或者起碼同自己人平排面向敵人,令敵人唔敢輕易出拳。

而最無腦嘅方法,係拉住自己友,都唔知係咪睇TVB膠劇睇得多,咁樣唔只令到自己朋友係鏡頭下出盡洋相,仲會幫埋敵人輕易出拳突擊,你就會變成將朋友捲入戰局嘅幫兇。

所以,以後當有人兇緊你嘅時候,如果有個和事佬拉住你唔畀你行向前,個條友一係鬼,一係戇鳩仔。

綜觀以上所講,梁天琦今次件事,擺明唔係一對一,而係一組人對梁天琦:紅褲條友扮勸交但全程都只係阻礙天琦,個女人拍片又全程影住天琦,而兩個港鐵職員集中火力欄住梁天琦,更加係助長緊大公記者繼續挑釁。

最後,希望各位同路人,唔好再塑造梁天琦係弱者,呢招對本民前係唔work架,本土派無需要故作矯情,網上有好多其他方向嘅野可以講可以做,等緊大家去講去做。