早前去聽林海峰《廣東話是但嗡》,佢講左一樣野好到肉,亦串緊好多現場觀眾,就係廣東話越黎少人講,香港人自己都有好大責任,因為香港人無出力去阻止普教中,甚至迷戀K-Pop,根本就係親手將廣東歌送入絕路。當有一日廣東歌消失,普教中坐大,連小朋友講句廣東話都要比同學告狀,仲有小學校規禁止講廣東話,香港人仲有咩機會講廣東話? 有嘅,爆粗果陣囉,不過都隨時可能好似林海峰咁講,企係尖沙咀廣東道講「DLLM」,啲人當係外語咋陰公。當一種土生土長嘅語言都可以被消滅嘅時候,香港人距離絕種,都唔遠。

其實我一直都諗唔通點解咁多人迷戀K-Pop,女歌手個個都同一個倒模出黎,只係識得賣弄性感同長腿,男歌手就個樣好少少囉,重點係,當你地聽緊佢地唱韓文歌嘅時候,你地明唔明人地唱緊乜呢? 音樂之所以可以感動人心,講求的係共嗚,係要配合旋律同歌詞,旋律好聽自然加分,歌詞到肉就更加係不得了,就好似早期首羅生門咁,點解可以紅到咁? 咪就係因為呀Y份歌詞寫出左無數人的心聲囉!喂呀哥,你都要識聽果種語言,你先會有共鳴架,唔係睇人個樣同埋睇人個胸就會有囉。

講到呢度,一定有人話自己係鐘意韓國文化乜乜乜,問心啦,去睇咩Big Bang果d男男女女,有幾多真係識韓文呀? 有幾多人真係會研究韓國嘅歷史同文化先? 就算韓國文化有幾好,乜唔係應該要先了解香港文化,先去再學其他國家嘅文化咩? K-Pop好聽,都唔代表要放棄廣東歌架,係咪先?

咁當然香港政府都係仆街架喇,寧願將啲錢呢就用晒去起高鐵、三跑、買鬼國列車、送比大陸振災,都唔留番去幫音樂工業,呢一點真係同韓國政府差天拱地,人地推動音樂真係好大手筆,年年都會批好多資助出去,所以韓國音樂事業先可以搞到咁大,大到可以入侵埋香港。不過我成日都咁覺得,如果自己人齊心對抗,邊有咁易入侵到,輸嘅原因係因為一大堆港豬,盲愛K-Pop,放棄廣東歌。

講番「普教中」,佢之所以越黎越多學校做,真係多謝港豬爸媽唔少,因為佢地要面向祖國,想自己仔女日後搵人仔,所以覺得佢地用普通話學中文都無問題,甚至放棄埋廣東話都無問題,但呢個就正正係最大問題。點解要放棄自己咁耐以黎嘅母語呢? 想學普通話無題問架,你咪比小朋友當係外語咁學囉,全世界都無一個地方會好似香港咁,會要小朋友放棄母語而去學外語囉,都痴撚線嘅!

我都唔知香港仲有幾多人在意廣東話,仲有幾多人會撐廣東話,我只係知道,到我死果一刻,我都會撐廣東話囉!