結語

其實除左樓上所講既超級工程之外,響圖拉真(Trajan)大帝年間仲有好多好多既工程成就,例如響今季一開始時所提及至今仍運作良好,可以承載重型貨車經過,位於西班牙既Alcántara Bridge

仲有現存運作中最長既羅馬橋樑:755米長既梅里達大橋(Puente Romano, Mérida)

唔知大家仲記唔得得,圖拉真大帝既鄉下其實係響今日西班牙境內,當佢登位之後,就響西班牙境內起左好多既宏偉又實用既基建,惠及故地既同鄉。而響羅馬,除左以上所介紹過既代表性作品之外,佢仲興建左唔少利民既基建,包括一條新既40公里長既水道橋,圖拉真水道橋(Aqua Traiana,109年6月24日落成)

及當時羅馬最大(330X215米)既浴場:圖拉真大浴場(Terme di Traiano,104-109年)

圖拉真係一個優秀既將領,備受軍人愛戴既皇帝,佢亦都善待跟隨佢出生入死既戰士。圖拉真年間,安置退役既兵將既新興城市拔地而起,包括位於當時肥沃北非土地上既添格古城(Timgad)

圖拉真年間響行省大興土木,建造既建築不計其數,恕難響短短八季既篇幅中盡錄。但至少從今季既內容,我地可以一窺圖拉真,以及佢最得意既首席建築師大馬士革的阿波羅多羅斯既代表之作。

未竟的霸業:圖拉真的遺憾

公元117年,圖拉真帶領住羅馬軍隊一直打到左波斯灣(Persian Gulf)。當時年老而身體開始衰敗既圖拉真望住波斯灣既滾滾潮浪,發出左一個感慨、一聲嘆息。佢已經達成左羅馬軍隊從來未征服過既疆土,但佢仍然遺憾自己年紀已老,冇辦法仿效400多年前既亞歷山大大帝(Alexander the Great)飲馬印度河(Indus River),完成世界既霸業。

公元117年8月9號,64歲既圖拉真帶住呢份遺憾辭世。雖然作為當時世界最強大帝國既元首,呢位羅馬帝國既一代天驕並無如埃及既法老王或者秦朝既秦始皇一樣宏偉既陵墓、數不盡既珍寶作陪葬品。不好奢靡浪費之風既圖拉真按照羅馬傳統進行火葬,塵歸塵、土歸土,佢既骨灰靜靜咁長眠於圖拉真記功柱既底下,只有至今栩栩如生既浮雕,仍然默默訴說響記憶中永垂不朽既雄心同功勳。

–超級工程:羅馬是怎樣建成的第六季完–