正當裕華在玩Pokemon Go宣傳,而你卻擺出一副眾人皆醉我獨醒的嘴臉,我只能笑你不懂時勢。更好笑的是,好多人是在Facebook說出「Pokemon有咩好玩」,「玩物喪志」之類的話。喂!阿哥!Facebook曾幾何時都被喻為有咩好玩,搞到人癲曬架!乜你仲未戒甩Facebook咩?

當然,我只係笑下你遮,無咩惡意,爭拗贏左又無獎品。人類存在於世上,本身就係一件很瘋狂的事。所以我無興趣討論做乜啲人玩遊戲玩到咁癲。再講,當某個行為好像傳染病一般世界各地好多人同時在做時,再討論個遊戲有咩好玩,已再沒意義。我有興趣討論接下來社會趨勢怎麼樣。當然,部分朋友堅持不玩,又沒甚麼大不了,社會是多元的。

容我先回應一個觀點。有朋友話睇死Pokemon Go紅唔到好耐,因為不是人人對寵物小精靈著迷。持這種觀點的朋友,只看到Pokemon Go只是一個遊戲,而忘記它其實已成為一個平台。如果話不是人人都喜歡寵物小精靈,那麼,如果有一日Pokemon Go跟Hello Kitty人物Cross-over、跟Star Wars人物Cross Over,再唔係,讓大家捕捉Q版關羽、張飛吧,總有一款啱你口味。

小精靈只是一件讓遊戲地圖盡快普及的外衣

Pokemon Go背後的核心技術無非就是Google Map。Google Map好多人在用,但他的工具感太重了,唔夠貼地,未能真正把電子地圖與現實社區連接起來。為了方便大家理解,我會稱Pokemon Go為一個「遊戲地圖」平台。好多人都知,Pokemon Go的前身是Ingress遊戲,但Ingress沒有如Pokemon Go般在世界各地爆紅,究其原因是Ingress沒有寵物小精靈這件奪目耀眼,能夠迅速吸引人注意的外衣。

一套再好的技術,如果少人用,都係枉然。情況就好似一套好的政治信念,只有幾個麻甩老高談闊論,曲高和寡,改變不了社會。如果派個女神出來宣揚,可以迅速吸引人注意,宣傳效果事半功倍。然而美女攻勢只是手段(means),不是目的(ends),最終要你套政治信念係得嘅,市民大眾才會跟你去行。Pokemon Go都係一樣,寵物小精靈只係一件外衣,最終要「遊戲地圖」這個平台堅係得,成件事才能持久。

裕華頭班車只是初階宣傳

當裕華國貨都懂得乘坐Pokemon Go的頭班車拿來宣傳時,我看到「遊戲地圖」大熱的趨勢已形成。裕華的玩法是十分初階。裕華宣傳自己是道場,讓大家來挑戰,然而叫大家把挑戰結果Upload上裕華Facebook,裕華送你十蚊禮券購物。

我認為香港各個大型商場可以咁玩。擇一日某時段係商場舉行武林大會,邀請一班名星來與市民一齊組隊互相挑戰。市民除了實地見到名星之外,現場又有多部大電視直播手機挑戰實況。順手可以大肆宣揚手機PlayTo功能,協同效應宣傳埋可讓手機畫面即時傳送至大電視或投影機的裝置。當然,聚到人流實可以再衍生其他嘢。

我以前上過一啲Google培訓班,原來Google有某種廣告方式叫做「放炸彈」,意思是挑選某個時段、在某個特定區域範圍集中火力做宣傳,只要人們在這個特定時間特定地方打開Google去搜索某組Keywords,人們便立即看到你的廣告。但我諗左好耐,到底這種「炸彈」有何成效?要人同時集體開Google已經好難,仲要大家一齊搜索同一組Keywords。

宣傳炸彈不是夢

Pokemon Go的出現,令這種宣傳「炸彈」變得更有睇頭。例如預先在Facebook放風,告訴人們在某晚某時段去某個公園的Pokestop,可獲得特別道具,或者可以捕獲某個特級寵物小精靈。到時,透過GPS觀察,或者透過現場肉眼觀察已聚集夠多人數時,便在遊戲之內,或在現實世界,投下一個「宣傳炸彈」。你話產品推廣、政治宣傳、公開求婚,向人救助、或者只係玩一啲無聊嘢,乜都得。反正總會有人發揮創意提供新內容,不斷創造驚喜,令人Keep住用Pokemon Go這個「遊戲地圖」平台,讓「遊戲地圖」融入生活,並成為與人溝通不可或缺的一部分。