圖拉真廣場(Trajan’s Forum)
羅馬城經濟及商業活動既中心、公共圖書館、世界最早既多層式購物商場

背景
記得之前講到公元106年,達契亞戰爭(Dacian Wars)結束,圖拉真大帝(Trajan)帶住價值連城既戰利品戰勝凱旋。有左呢筆龐大既財富,圖拉真著手計劃響永恆之城羅馬留低佢自己既輝煌。於是大馬士革的阿波羅多羅斯(Apollodorus of Damascus),圖拉真皇帝既御用建築師,就幫呢位勝利歸來既皇帝響羅馬中心地帶設計左一座規模史無前例既龐大廣場建築群慶功,希望永恆既建築令圖拉真既芳名名垂千古。

阿波羅多羅斯所設計既圖拉真廣場建築群,位於羅馬城中心地帶,由六個主面部分組成:
Ⅰ:平面圖呈長方形、被大理石柱廊環繞既大廣場
Ⅱ:作為法院及發表演講用既有蓋廣場巴西里卡
Ⅲ:拉丁文及希臘文既雙語圖書館
Ⅳ:38.4米高既圖拉真記功柱
Ⅴ:圖拉真神殿
Ⅵ:擁有150個鋪位既多層式購物商場

建築群總長310米,闊185米,面積同宏偉程度將遠遠超過凱撒、奧古斯都所興建既廣場。圖拉真廣場(Trajan’s Forum)所帶黎既視覺震撼,甚至令4世紀既東羅馬皇帝君士坦尼烏斯二世(Constantius II)驚嘆為「空前絕後」。


全盛時代(2世紀)既羅馬鳥瞰圖,人口擁擠、寸金尺土、人均居住面積狹窄,好有今日香港既縮影

但問題黎喇,話說圖拉真時代既羅馬城已經非常擁擠。100萬居民當中既大部分逼響20-30平方公里既市區(全盛時既羅馬係少數冇城牆既古代城市,所以亦都難以估算確切面積),而有錢既商人、有權既元老就紛紛遷離市中心,搬到市郊既大宅。城內寸金尺土,住宅逼不得已向高空發展。到處佈滿五層、六層、七層甚至可能更高既住宅大廈,要騰出地黎起廣場,實在係尺土難求。圖拉真又唔係暴君,就之你燒撚左d民房清空土地黎起廣場,響軍隊中由低做起既圖拉真根唔係d咁既人。佢決定移走城內兩座山既部分:Quirinal同Capitoline山丘,以清出新既土地實踐佢既宏大建築計劃。


圖拉真廣場既藍圖。紫色部分為圖拉真廣場(Trajan’s Forum),淺藍色部分為圖拉真市集(Trajan’s Market, 位於被挖開既Quirinal山),紅色部分為第三季提過既奧古斯都廣場(Forum of Augustus),綠色部分為凱撒廣場(Forum of Caesar),黃色既建築物係羅馬元老院議事廳(Senate House)

圖拉真廣場


電影《帝國驕雄》(Gladiator)中圖拉真廣場舉行既凱旋儀式

圖拉真廣場本身係一個200米X120米既長方形廣場,入口位於南面,連接奧古斯都廣場既北邊。入口處係一座宏偉既凱旋門(Triumphal Arch),門頂係一尊駕馭六匹馬拉戰車既圖拉真大帝雕像。環繞住廣場既係86-92根大理石立柱,立柱頂端採用有趣既設計,因為每根立柱柱頭頂部都設有一尊栩栩如生既達契亞人像支撐柱廊既穹頂,象徵住建造廣場既經費來自對達契亞王國戰爭既勝利。達契亞戰俘像既數目估計有75-92尊,已發現既人像高度由2.25米到3.24米不等。更有趣既係,作為勝利者既羅馬人,似乎並無刻意利用雕像妖魔化達契亞人既形象。雖然達契亞戰俘頭上頂住屋頂,但形象仍然鮮明活現,充滿人性。


圖拉真廣場柱頭頂部達契亞戰俘(Dacian prisoners)雕像,現存品(大理石材質)

圖拉真廣場柱廊頂部陳列既達契亞戰俘雕像復完圖

返到去廣場本身,我地知道廣場露天部分長200米,闊120米,地面鋪砌大理石板。圖拉真廣場所用既石材好多需要千里迢迢咁從外地進口,石質同顏色不盡相同,可見心思同造價都唔惹少。露天廣場中央係一座圖拉真大帝雕像,兩邊柱廊作商業用途,充滿左進行買賣既商販。


圖拉真廣場復完圖

今日既圖拉真廣場

烏庇阿巴西里卡
廣場既西北面,係幾座重要既行政建築物。首先最大座既就係烏庇阿巴西里卡(Basilica Ulpia),呢座建築物長117米,闊55米,屋頂高度達到50米,相當於15層樓高,係羅馬城內最大既巴西里卡(Basilica)建築。烏庇阿巴西里卡係屬於世俗(secular)用途建築物,主要用於民政、法院聆訊、演講、商業、皇帝出巡等。牆身、地面、立柱全部使用昂貴既進口大理石材,屋頂鋪上青銅瓦片,太陽之下閃閃生光。巨大既屋頂亦都確保巴西里卡裡面進行既活動,可以不論天氣狀況、不論風雨,都能夠順利響安全既室內進行。




烏庇阿巴西里卡(Basilica Ulpia)復完圖

烏庇阿巴西里卡(Basilica Ulpia)原址大理石地板實物。兩千年前既羅馬室內設計,華麗、耐用,直到今日仍然不顯過時

圖拉真圖書館(Biblotheca)

響樓上提到既烏庇阿巴西里卡(Basilica Ulpia)隔離,係與之相連既圖書館(Bibliotheca)。話說圖書館既文化,響圖拉真之前400年既希臘化時代(Hellenistic Era)開始已經好盛行,後來呢股文化仲影響到稱霸地中海既羅馬文明。同好多羅馬時代既圖書館一樣,圖拉真圖書館係雙語既。圖書館分為東、西兩翼,東座係存放拉丁文書卷(Latin)、西座係存放希臘文書卷(Greek),兩座中間係設置圖拉真記功柱既中庭花園。當時,拉丁文既書多數係法學、文法、修辭學文獻,而希臘文既書多數係哲學、數學、自然科學等。圖書館東西兩翼都有兩層樓高,地面同樣鋪砌經打磨既大理石板,可以比學者最好既環境讀書、寫書。館內設有存放20,000卷書藉既書櫃、位於中央既閱讀廳設有桌椅、周圍陳列學者雕像、而樓頂設有大玻璃窗引入天然光線。雖然規模比起據稱藏書有50萬卷既亞歷山大圖書館有段距離,但已經不失為羅馬城當中一座最大既圖書館,各科目知識既寶庫。


巴西里卡及圖書館平面圖

圖拉真圖書館內部復完圖

位於中庭既圖拉真記功柱(Trajan’s Column),另有一節專門提及

圖拉真廣場建築群施工約6年,於公元112年落成啟用。至於圖拉真記功柱同市集,就要再遲多一年,至公元113年先正式落成啟用。

圖拉真市集:世界最早既多層式購物商場
響今日既世界,行商場係好受歡迎既假日活動,或者唔止假日,就算平日放工放學後,好多人都會選擇同.屋企人、男女朋友、三五知己之類件行商場。原因無他,因為響多層式購物商場,響同一座建築物入面應有盡有。無論係娛樂戲院、餐飲美食、買衫買鞋、超市、銀行,又或者想同朋友落酒吧飲下野、睇下波,呢d要求響商場全部一應俱全。

生活響21世紀,我地好容易會將所有野睇成理所當然,又或者睇得古裝片多,以為古時代既人生活一定係好落後,同我地好唔同。但當我地細心睇歷史,恐怕呢個只係事實既部分,而唔係事實既全部。

響1,900年前既公元2世紀初,圖拉真動工興建左一座,亦都係人類歷史上第一座近乎現代式既購物商場——圖拉真市集(Trajan’s Market)。呢幢磚石混凝土建築,可以話係古羅馬人「現代化」生活既寫照,而呢幢市集背後「將所有商店集中響同一幢建築物既屋頂底下」,以方便商人同顧客進行買賣既先進理念,更加係遠遠超越其時代。


今日既圖拉真市集

記得我之前提到,圖拉真大帝為左清空足夠土地建造氣勢恢宏既廣場,不惜大動土木,拆除兩座山丘既部分。咁就產生左個問題:山泥傾瀉。傳統上,要解決呢個問題,就要靠護土牆(retaining wall)。但大馬士革的阿波羅多羅斯係一位優秀、聰明既建築師,佢想到一個辦法,將一座拱形既建築物加諸山丘被挖開既坑上,利用同拱頂相同既原理,將山泥向外自然塌落既推力,通過拱形既弧面得以分散。於是就係咁,阿波羅多羅斯巧妙地將建築物本身造成一堵巨大既護土牆,就設計左世上可以居高臨下俯瞰整座圖拉真廣場既高層市集,第一座多層式購物商場——圖拉真市集(Trajan’s Market)。

圖拉真市集既建築主體最高有6層樓高,下面兩層呈弧形,上面3-4層係正常既磚石建築。建築主體至今保存完好,甚至有部分仍然被使用。圖拉真市集總共有150間商鋪,集中響同一幢由5到6層樓高既建築物,開創左歷史既先河。而一列標準化既鋪位同廚窗係由此所創,商鋪各有各既鋪面,長廊井井有條。除左奴隸之外,圖拉真呢個購物商場既混凝土穹頂下會搵到既商品,同樣亦都係一座現代商場入面會搵到既野:快餐店、食肆、裁縫店、鞋匠、香料店、首飾店、銀行、診所、公眾圖書館、甚至向帝國行省遊客售賣記念品既店鋪。

部分至今仍然在使用中既鋪位,留意二樓既冷氣機

而圖拉真市集入面,更加可能有類似現代唔同層數賣唔同類別商品既習慣。例如三樓既平臺(下圖標注為2既部分),佢既拉丁名Via Biberatica,就意味左呢度好可能係一條酒吧街。古羅馬城係冇宵禁既規定,商業活動響夜間都可以進行,類似於夜市。加上日間馬車唔比入城,通常夜晚先多來往既馬車聲(而且仲會塞車)。正因為咁,羅馬城既夜晚係好撚嘈,有幸生活響羅馬帝國極盛期間既諷刺詩人尤維納利斯(Juvenal,正正就係描寫筆下主角行200級樓梯先返到屋企果個),作品就有投訴夜間既羅馬係嘈到根本訓唔到。至於酒吧既運作,通常都係一直到夜晚時候(同現代一樣,古羅馬人日間工作,夜晚有人會落吧消遣,或者同朋友社交)。


圖拉真市集既平面圖及橫切面圖

穹頂下既購物長廊,以及兩邊既鋪位

圖拉真市集內部既購物長廊及鋪位剖面圖

響圖拉真市集,古羅馬人同現代人一樣行商場,而商場入面更加可以搵到來自世界各地既商品。響圖拉真市集餐廳供應既菜式入面,有用到既材料可能包括:羅馬週邊生產既午、羊、豬、雞肉、西班牙既醬料(Garum)同橄欖油(Olive Oil)、用北非同埃及小麥焗製既麵包、從地中海撈獲既海鮮、意大利南部養殖既生蠔(Oyster)……甚至更離奇既,東非既長頸鹿肉同歐洲既熊肉。響呢度你甚至可以搵到來自世界各地、以至羅馬帝國以外既商品。遠至非洲既象牙,印度、印尼既香料同鑽石,東漢既絲綢等奇特既商品都一應俱全。公元1-2世紀期間,每年都會有120艘左右既羅馬商船從紅海啟程前往印度,甚至更遙遠既東方,呢d異國貨物源源不絕湧向帝國既心臟——羅馬城,為羅馬既居民帶來「全球化」同洲際商貿既便利。而至1,900年後既今日仍然屹立於羅馬城內既圖拉真市集,除左係吸引遊客既景點外,亦都見證住古羅馬人曾經有過既「摩登」生活。


圖拉真市集立體圖

今日既圖拉真市集鳥瞰圖