本屆議會終於結束,除左終於拉倒醫改,繼網廿三之後,再一次公民社會勝利之外,曾鈺成臨別之言亦備受注目。除左必然成為經典果段soundbite(「祝福香港,香港一定要贏。」)之外,曾主席另外有兩句話,值得分析。

第一,「能夠係依個咁精彩既議會,做左8年主席,依個係我好高既榮譽,好大既享受。」

議會能夠為之精彩,當然係因為佢情節豐富,議員針鋒相對,雄辯連場。一旦出現爭議,拉布、流會、無限發言、編更反拉布,雙方各為政治自的,屢出奇謀。而且政治係一日都太長,每每劇情峰迴路轉,未到三讀或者撤回,大家都唔知結果係點。議長要持平處理會議,心神必需集中,議事規則及先例必需熟識,各方想法亦必需平衡,其實係唔容易做。

某強大國家既議會,元首講話定必拍掌,議案永遠高票通過,議員意見高度一致,就冇可能稱之為精彩既議會。曾鈺成講得出咁樣既議會係佢既榮譽,證明佢認同香港既議會文化。佢亦可能係寄語下任議長,切勿為左政治任務,犠牲我地既議會政治。

第二,「我相信,我真係相信,議會內每一位議員都係用自己既方式,為香港服務。」

美國經典政治電影《Mr Smith Goes to Washington》裏面,年老參議員第一次教訓男主⻆,就係每一位議員都有民意基礎。政治上可以針峰相對,但係唔應該人身攻擊。

今日拉布戰,當建制派明白無望通過之後,空群而出,大肆攻擊泛民以及梁家騮醫生。言詞惡毒,甚於潑婦駡街。有一位的確表演左一段話明自己冇寫稿,完全爆肚式既「街巿婆論政」,另一位則響鐘,希望迫使泛民番入議會,聽第三位鬧郭家麒醫生做「絕代無恥」。

曾主席始終係老一輩,見到後輩如此墮落,想必搖頭嘆息。依一句說話,我諗係佢教導自己陣營既議員。再大既權力,冇風度既話,都難贏得民心。

「祝福香港,香港一定要贏。」
當然好多人話曾鈺成老謀深算,或者每一句說話都係諗過度過,但係而家在任既其他高官,會否願意離任時候,講一句「祝福香港」?