人由出世開始就需要不斷學習,直到你死果刻都係要不斷學習。
係我地兒童至青少年期間,我地返學讀書,以學習呢個世界既知識。
果陣時我地每日都要返學讀書,但到底我地從中學習到幾多野?

好多人可能讀學校既學習內容根本冇興趣,可能有人根本唔適合用「讀書「呢個方法黎學習 (Yes,「讀書」係學習既其中一個方法only,唔等於學習本身)。

好多人會將 「讀書」同「學習」兩樣野撈亂,覺得讀到書,考試成績好就等於知識豐富,係社會上就係一個有用既人 (我諗最常灌輸呢樣野比我地既應該係我地既親人……)。
所以出現左好多讀唔成書就覺得自己冇用而放棄自己,同埋覺得自己已經係學校讀晒所有野,出到黎唔使再學落去既高分低能,前者因讀書而自卑,後者因讀書而自大。

但其實兩者都唔了解學習係咩一回事。

間唔中睇有關日本既趣聞,都會見到好多唔同類型既大師,好似拉麵大師、捕魚大師、裝修大師、甚至近排最紅既執屋大師* (講緊執屋執到上埋Times百大人物)。
呢班大師係咪個個都讀書好叻大學畢業? 我諗未必,但係佢地身上都有一個共同特質:
佢地都花好多時間同心機,係自己既領域上不斷學習,就算成為大師都唔會因此而停止。

真正既學習係「以有涯隨無涯」,而且自己好enjoy呢個跳崖既過程。
地獄廚神Gordon Ramsay係一個訪問曾經講過:
當我煮到世界上97%既食材,即係仲有3-4%既食材仲未被我發掘,但就係果幾個%先係最吸引。#

所有讀唔成書但最後飛黃騰達既成功人士,都係因為佢願意係自己既領域不斷學習、研究,讀唔讀得成書對佢地而言係冇必然關係。
帶領佢地成功既,唔係學歷,係心態。

所以,讀書讀得叻又好,讀得廢又好,咁又點?
揀一個崖,然後跳落去把啦。

搏盡而無悔者,欲無悔,先搏盡。
最後祝大家搵到自己鍾意既靚崖安心上路。 =]

* 請Google 「 近藤麻理惠 」 ,會搵到好多

# 節錄自呢個專訪,取其大意:
(順帶一提Gordon Ramsay 係米芝連七星主廚,2013年入左烹飪名人堂)