議會程序懶人包:修定《醫生註冊條例》既草案上星期五二讀通過,代表立法會原則上支持草案。依家議會既過程叫全體委員會,係立法會辯論議案既修正案;正常黎講,修正案辯論完成之後,議會將就逐條修正案表決。到修正案完成表決後,議會則進行三讀,最後表決修正後既草案。只有當草案三讀通過,先會經特首同意,以及刊憲成為法例。

醫改條例,依家實際戰況如下。

1:本屆立法會,將於星期五半夜結束。現有時間,包括星期三朝早十一至八點,星期四中午十二點至八點,以及星期五朝早九點至零晨,總共係32個鐘頭。只要到星期五半夜十二點,草案仍未三讀,草案就會作廢。就算政府係下屆立法會再提議案,亦需重新再做一次立法過程。

2:星期三議會一開始,要提交十幾份年終報告,以及六條口頭質詢。口頭質詢,每條廿二分鐘,六條就接近3個鐘。故此,就算完全唔點人數,最快都要星期三下午兩點左右先會開始審理醫改條例。所以32小時,先減3至4個鐘頭,得番約28小時。

3:拉布第一招係點人數。點人數係基於基本法第75條:「香港特別行政區立法會舉行會議的法定人數為不少於全體議員的二分之一。」當議事堂唔夠35位議員,任何議員都可以響鐘要求議員出現。所以實際上,如果議事堂有超過35位議員,係無可能點人數。建制派議員上星期四開始執行黨鞭以反拉布,以輪更制保持議事堂有三十五位議員,令到拉布一方唔可以點人數。但係輪更制係45分鐘制,每個鐘頭會有15分鐘小息,拉布既議員亦幾乎一定會點人數。所以實際上,係拉布戰之中,議會實際上最多只有七成半既效率。故此,實際既議事時間係21小時。每次建制隊形失效,則點人數次數更多,實際議事時間更少。

4:上面提出既議會程序之中,議員尚有幾次機會截停程序。所謂40(1)、中止待續、付委等等,都係依類議案既例子。上星期五,議會就係審議緊梁家騮議員既55(1a),將法案付委;係三讀之前,議員再有另一次機會,提40(4),將草案中止待續。依類議案,每位議員有權發言一次,最多十五分鐘。如果有廿位議員發言,每位都用盡十五分鐘,就等於五個小時。好多時候,建制派議員亦會發言,目的唔係拉布,而係表明立場。所以淨低兩次議案:55(1a)同40(4),最樂觀估計,係可以花費10至12小時,令實際有效時間由21個鐘頭,跌至10鐘頭左右。

5:另一拉布點,係修正案辯論係仍然未展開。修正案辯論,主席一般會分為幾場,每場每位議員發言次數不限,但係每次發言最多十五分鐘。但係當主席裁定議員既論點重覆,則有權結束該場辯論,進展至下一場辯論。剩番10個鐘頭,每節十五分鐘,就係四十次發言。只要有幾位議員,手持四十次發言,論點不同既講稿,其實就能夠拉甩依條法案。

當然,要拉甩議案,好在乎夠唔夠人執行第4同第5點。如果梁家騮議員既55(1a)議案,如果後日冇人講野,咁就令政府既時間又增加番5個鐘頭,就要係修正案階段再多發言20次。同樣道理,雖說主席裁決修正案辯論,係基於整體既論點,但係如果多幾位議員發言,被裁定重覆既機會就愈細,拉到既時間就愈長。

所以到最後,拉唔拉得甩靠既唔係雄辯滔滔既金牙大狀,而係夠唔夠人去講野。與其思考「八奇策略」,點樣二讀贊成,三讀反對,或者一個黨同時投贊成、棄權、反對,不如勤勤力力去發言,保證用到民眾投票賦予議員,基於議事規則既權力。

金庸人物裏面,筆者最記得郭靖。無論敵人係用咩野招式,郭靖都係一招「亢龍有悔」。有時候,以拙勝巧,先至係長勝不敗既策略。