中華文化有文房四寶-紙,筆,墨,硯。鋼筆界都有紙,筆,墨三大範疇可以玩。上次講左筆,今次就講下墨水啦。墨水係鋼筆界重要一環,首先當然係因為要有墨水先寫到字啦,另外其實唔用筆同墨配搭可以寫出唔同韻味,仲有就係鋼筆墨水係水性,所以寫個時收筆嗰下會有深淺色陰影效果(Shading, 當然視乎墨水性能啦)。而某啲墨水係紙上面乾透之後顯出嘅光澤效果(Sheen)亦都係原子筆做唔到嘅。

(圖1:全局圖,已經見到唔少字有Sheen效果)

(圖2:近鏡, 個Sheen字本身真係有Sheen效果)

(圖3:Fountain pen Ink)

鋼筆墨水一般講係水加染料(Dye)再加防腐劑而成。係筆入面嘅儲水庫(Ink Reservoir, 視乎上墨方式啦)透過毛細管作用經筆舌上面嘅墨道(Ink Channel)流落筆尖從而流落張紙,形成筆跡。

而大家係網上見到個啲金/銀色墨其實係用顏料(Pigment)同金粉發色,再加啲膠收杰啲墨水。呢隻墨入左落鋼筆會塞嘅,千其唔好試。

(圖4:Dr. Ph Martin 螢光銀色閃粉墨)

我自己中意用鋼筆其中一個原因就係因為可以用好多唔同顏色嘅墨水,有活潑亦都有沉實,就算係同一隻色系,都有分唔同色調(Tone)。而我最中意嘅顏色係土耳其藍(Turquoise), 同埋各種各樣嘅藍色。

(圖5:各種藍色(由上至下):J.Herbin 1670 – Emerald of Chivor、Noodler’s – Navajo Turquoise、 Montblanc – Honore de Balzac )

(圖6:Akkerman Treves Turquoise)

而其中最中意嘅就係Akkerman Treves Turquoise。個波子汽水樽就唔使講啦,不過其實隻色都好亮麗,仲有幾靚嘅陰影效果。

(圖7:Akkerman 墨水樽)

另外有一隻墨水都想講下,就係Noodler’s van Gogh Starry Night Blue。呢隻墨係一個外國論壇嘅紀念墨水,不過只有百樂平行筆先可以發揮到星夜藍嘅淺色部份。如果溝少少金粉墨就真係好似梵高嘅名畫《星夜》。
今次講到呢度先,下次講紙。

(圖8:van Gogh Starry Night Blue)

圖片來源 : By [email protected]自動鉛筆情報局(香港)