望住網上班有樣有身材又成日放性感相嘅女神,唔少人都有諗過「如果佢係我條女就正」,話哂有個咁正嘅女朋友,點都會有種人生贏家嘅感覺。

千祈唔好咁諗。

點解我咁講?我講下N君經歷比你聽就知。

佢女朋友IG嘅Follower近七萬,閒閒地放張相幾千Like走唔甩。人靚腰瘦上圍豐滿再加迷人大眼,時不時都有人搵佢賣下廣告拎件產品影下相咁,賺埋賺埋可能多過你同我份糧。最難得係網上追佢嘅狗公不斷,但佢同N君感情都Keep得到,唔受人地影女響。你聽完當然羨慕,但N君就話有苦自己知。

「同佢食飯,幫佢同碟嘢影完相即執,執完覺得角度唔好又要我再影過,直到佢話『OK』我先可以開始食。早午晚都係咁,就好似食飯前禱告一樣,但當中段時間夠你讀完本聖經,我都唔知幾耐冇食過一碟餸係熱嘅。」N君口中嚿咕嚕肉都未食完,佢已經準備夾第二碟嚿西蘭花。「邊度啲嘢食Hit,邊度有咩期間限定店佢第一時間拉埋我去。叫到一枱都係嘢,佢影完就乜都食一嚿,我就負責執手尾,結果成日食埋啲得個樣但難食到嘔嘅垃圾。」

好唔容易等佢呻完食果Part,有個朋友就好心急問佢成日有機會喺床上收服佢係咪好爽。但N君只係目無表情咁望一望個朋友。

「你知唔知女人點解化完妝仲要P圖?就係因為真人冇咁靚。你唔覺隨手碌個IG一堆靚女,但出到街就好耐都見唔到一個咩?因為Photoshop唔可以出街用。所以唔好以為做果陣我可以望住佢IG個樣,佢落咗妝你真係認唔出。」N君講開就唔停口。「仲有啊,佢望住電話仲多過望我,食飯果陣係咁、同佢出街係咁、連睇戲都耐唔耐望下部電話,就係差在搞嘢冇睇到,因為冇化妝,唔可以即興影相。有時你會覺得佢男朋友係部電話,自己只係一個隨行攝影師。」

我問佢唔覺得咁樣拍拖好辛苦咩?只見佢苦笑一下話鐘意佢冇計。「同佢拍咗三年拖,如果唔係真心鐘意都Keep唔到咁耐。唯有希望過兩年結婚之後情況會好啲啦。」話口未完佢女朋友就打比佢叫一齊去試間新開嘅甜品鋪,N君放低今餐飯錢,又要趕去會合佢女朋友。「而家都係要做住24小時On Call先。」依句係佢推門走前最後一句。

拍拖拍到返工咁就係為咗有個PS過嘅靚女朋友,真係你要埋我果份。