串燒我一啲都唔抗拒,除咗樓下果間垃圾:最平九蚊串,細串到暈不特止,有次我叫外賣,其中一串唔知咩肉多毛到死,自始我冇再食樓下間串燒。

真係諗起都打咗個冷震。

不過好彩,喺沙田要食串燒都唔難。好運中心最邊邊、吉野家後面、賣舊式唱片隔離,有一間小食鋪長期有人排隊。食晏多人買佢個車仔麵,而五六七點依啲時間,串燒就最受歡迎。

佢種類唔多,牛肉雞肉豬頸肉煙肉腸雞翼司華力,好似仲有一兩種丸,係咁多。除左司華力好似貴啲,其它一律十蚊串,但望住果串嘢嘅份量你就會覺得真係好抵食,因為你食落口係真正咬緊一舊肉而唔係一粒。個人最鐘意食豬頸肉,佢果種爽口同油脂加埋真係想食多幾串。牛肉雖然唔係靚嘢,但以佢個價錢同份量嚟講,有牛味冇乜雪味,個人認為合格有餘。佢仲有賣魚蛋燒賣,但以前粒粒發到大過網球,一睇就知唔得;而家情況好咗,正常Size,但我仲未試過。

講好食,佢唔夠班,但對一班街坊嚟講,七十幾蚊串霜降牛串燒真係食唔起,依種小店反而可以滿足下草根個口。有時口痕想食串燒真係想掃街式咁比廿蚊出嚟,你叫我入餐廳坐定定食完埋單一人四百蚊,好貴,好冇意思。偏偏而家啲商場係咪都行高級路線,小本經營做唔住,租親都係大公司連鎖店,打開Menu食個沙律過百起跳都算,仲要唔係真係好食。有時行商場望住啲大牌子真係悶,十間商場十間H&M或者IT,十間都賣同一樣嘢。食嘢又係,將新城市啊新世紀啊朗豪坊又一城啲餐廳List泊埋一齊,總有幾間個名老是常出現。好彩好運個場都仲好似廿年前咁,大部份自家生意,間新蒲坊仲做得住,唔係我都唔知喺邊搵返間又抵又唔錯又冇毛嘅串燒食。

另外一田Food Court果邊有間串燒都唔錯,不過價錢比新蒲坊就倍數計。食邊間?睇自已荷包決定。