圖拉真的超級港口(Portus, Harbor of Trajan)
Portus的六角形人工港

擴建中的港口
大家應該仲記得1世紀初克勞狄皇帝(Claudius,公元41-54年在位)幫羅馬起左個人工港口,叫港口城(Portus)嘛?直到圖拉真年間,呢個港口已經落成投入運作左近50年。但係呢個港口問題多多,包括長防波堤對於避風塘內既船隻保護不足,響公元62年,一場特大既風暴整沉左200艘停泊響港內避風既船隻。嘩!大佬!咁好唔掂當wor。沉左200艘船d船東咪蝕到仆街?仲唔鬼殺咁嘈咩!有見及此,圖拉真大帝決定響克勞狄港口避風塘既內陸開展第二期既工程,再起多一座規模宏大既全新人工港口:圖拉真港口(Trajan’s Harbor),比日漸往來頻繁既海商使用,亦都確保羅馬有足夠既港口基建設施處理大量湧入帝都羅馬既貨物同糧食。

公元103年,圖拉真港口正式開建。由於全個羅馬帝國歷史當中,只有一座人工港口係近於正六邊形,好多人都猜測到底呢個咁有趣既設計係邊個建築師設計。雖然遺址冇為我地提供答案,但考慮到絕大部分圖拉真時期既建築都出自大馬士革的阿波羅多羅斯(Apollodorus of Damascus)手筆,歷史學家大多相信圖拉真港口唔會例外。圖拉真港口既避風塘位於內陸,遠離風暴潮威脅,呈近正六邊形,每邊邊長357.77米,最闊處715.54米,面積39萬平方米。避風塘深5米,可以容納食水較深既大型船隻,但羅馬最大既船就可能要響克勞狄避風塘拋錨再用駁船。避風塘底部鋪砌石板,六邊形北部果面就設計成由深至淺既斜坡,最淺處只有1米,相信係用黎比新起好既船下水用。響六邊形既邊上面,佈滿左比船停泊既碼頭,大約每15米就有一座用黎繫纜既石樁,而考古學家發現,每個泊位上面刻有拉丁數字,標明泊位分區,可見碼頭運作已經非常之有組織,可以話井井有條。


圖拉真時期既金幣,記念港口落成(約公元112年落成啟用)

鳥瞰建成後既港口城,包括公元1世紀中葉建成既克勞狄港口(Claudian Harbor),及公元2世紀初建成既圖拉真港口

公元103年圖拉真港口動工前既港口城(Portus),顯示克勞狄第一期工程既成果

考古學家重構既羅馬時代港口城(Portus)地圖,外面既克勞狄港口避風港同內陸既六角形圖拉真港口清晰可見

港口的運作
圖拉真港口厲害之處,就係設計吞吐量。以港口泊位數目估算,圖拉真港口可以同時比100艘貨船停泊。如果假設每艘船可以載100公噸貨物,卸貨上貨耗時4小時(上貨100噸、落貨100噸),假設港口只在日間運作,咁一日理論上已經可以吞吐100*3*200=60,000公噸貨物。以兩千年前既古代,呢個數字顯得相當嚇人。因為呢個數字仲未計克勞狄港口本身既碼頭同另一個相鄰既港口奧斯堤亞(Ostia)。由於最近的考古發現奧斯堤亞的面積比原先估計的大近一倍,如果全部加埋曬,羅馬城專屬皇家港口群既總吞吐量可以輕鬆達到每日10萬公噸貨物,每年3,650萬公噸既物流量。

同樣係圖拉真發行既銅幣,正面為圖拉真側面頭像,背面為圖拉真港口

響圖拉真港口既每個碼頭,羅馬政府既市舶司(Portorium)官員會收取停泊費同幫貨物打關稅。而貨物上岸後,可以提據買家要求通過陸路或河運送到指定地點(通常係羅馬城或城郊),或暫時比租存放響港口既大型倉庫,呢d運作基本上同今日既港口冇太大分別。歷史學家根據古藉、馬賽克畫、已知貨物重量(沉船上發現好多大理石材,一塊都有幾噸,冇可能用人手搬郁)同當時已知技術水平相信,古希臘同之後既羅馬港口係世界最早使用起重機裝卸商船上既貨物,類似今日橋吊操作。除此之外,羅馬帝國幾乎全國採用統一容量既雙耳瓶(amphorae)裝載貨物,無論係西班牙行省生產既魚醬(Garum)、突尼斯同埃及既小麥、高盧既葡萄酒抑或希臘同東中海產既橄欖油(olive oil),都用相同既統一容量陶土雙耳瓶盛載。單單係一個羅馬城市郊棄置雙耳瓶既Monte Testaccio,碎片已經堆積成山,考古學家估計有5,300萬個雙耳瓶被棄置響單一處堆填區。先進既裝卸技術,加上早期既集裝箱化(containerization)統一簡化港口運作流程,都大大增加左羅馬港口既效率。


圖拉真港口其中一塊繫纜石

圖拉真港口鳥瞰復完圖,船隻同岸邊呈直角,起重吊機響船頭起卸貨物

圖拉真港口可一次過容納100艘船泊岸


部分港口區多層式行政建築物復完圖

港口,唔止得碼頭,仲要大量基建配套支持先有用。響六角形圖拉真港口既旁邊,羅馬人建造左巨大既貨物倉庫應付物流需要。造船廠、乾船塢(dry dock)用作建造及維修船隻、政府機構及商業辦公大樓作行政用途。附近甚至有住宅區、以及奢華既皇家宅邸,可以比皇帝出巡時作行宮之用。2011年,英國修咸頓大學(University of Southampton)既考古計劃就發現左一座巨大既,相信係造船廠既建築物。呢幢建築物長180米、闊60米、高度達到15米(約4-5層樓),係堅固既混凝土芯,磚面結構。建築物裡面至少有8個船塢,每個至少寬12米,可以同時流水線模式建造16艘中型商船。而造船廠設有屋頂,更可以支持全天候工作。除左地面上既建築物,港口仲需要完善既交通配套。新港口城(Portus)至少有一係硬面高速公路直通奧斯堤亞(Ostia)舊港口,兩條公路直通羅馬城。除此之外,港口城同臺伯河出口之間,仲有縱構交錯既運河,方便平底駁船進入河道。2010年,同樣係英國修咸頓大學Portus Project既考古團隊就發現一條闊度有成90米既運河,走向東南連接新港同舊港奧斯堤亞。呢d大規模既配套基建,都起左疏導物流既作用,防止出現貨物未能及時運走而堆積響港口既情況。關於道路同運河既交通配套地圖,請參閱上面既羅馬時代港口城(Portus)地圖。


在Portus進行考古發掘

停泊於內港碼頭既船隻

2011年考古季度發現既圖拉真時期造船廠(建築物5號),部分磚面及牆體結構保存完好




3D CG復完圖

行宮復完圖

曾經聳立於港口既圖拉真巨像

圖拉真港口的燈塔
最後,我地要提到燈塔。燈塔係希臘人發明,目的在於日間同夜晚引導船隻航向,安全進入港口、防止觸礁等。港口城作為帝都羅馬專屬港口,total有兩座燈塔,一座係克勞狄所建,係位於避風塘防波堤外,建於以卡利古拉巨船灌入水泥建造既人工島上,另一座係圖拉真建造,引導避風塘既船隻進入內港。呢d燈塔非常高聳,全部均以亞歷山大港燈塔作參考(托勒密王朝於公元前3世紀所建,高度120-140米,同大金字塔不相伯仲)。至於港口城既兩座燈塔,歷史學家難以估算其高度,但以港口規模判斷,按道理應該高達110米(超過30層樓高)。事實上,直到中世紀既記錄,仍然有記載大燈塔塔身所用既大理石材料存在。

馬賽克上既港口城燈塔


圖拉真燈塔3D CG復完圖

位於西班牙西北角La Coruña既海克力斯之塔(Tower of Herucules),建於約公元2世紀,係少數運作到現今既羅馬時代燈塔,由於保存完好,係研究羅馬燈塔建築既絕佳教材

黑夜中散射光芒既古羅馬燈塔